ملک کے مختلف شہروں میں چینی کی فی کلو قیمت 220 روپے تک پہنچ گئی ہے۔
ادارہ شماریات کی تازہ رپورٹ کے مطابق ایک ہفتے کے دوران سرگودھا میں چینی کی فی کلو قیمت میں 23 روپے اور کراچی و حیدرآباد میں 5 روپے تک اضافہ ہوا۔ اس اضافے کے بعد ملک بھر میں چینی کی زیادہ سے زیادہ قیمت 220 روپے فی کلو تک جا پہنچی ہے۔
رپورٹ کے مطابق راولپنڈی، کراچی اور سرگودھا میں چینی 200 روپے فی کلو تک فروخت ہو رہی ہے جبکہ حیدرآباد میں قیمت 190 سے بڑھ کر 195 روپے فی کلو تک پہنچ گئی ہے۔
ادارہ شماریات کے مطابق گزشتہ ایک ہفتے میں چینی کی اوسط قیمت میں معمولی کمی ریکارڈ کی گئی، جس کے بعد اوسط قیمت 188 روپے 69 پیسے فی کلو ہوگئی۔ گزشتہ ہفتے یہی اوسط قیمت 188 روپے 81 پیسے تھی جبکہ ایک سال قبل چینی 132 روپے 47 پیسے فی کلو فروخت ہو رہی تھی۔
مارکیٹ ذرائع کے مطابق لاہور میں چینی کی قیمت میں سب سے زیادہ اضافہ دیکھا جا رہا ہے، جہاں فی کلو چینی 200 سے 220 روپے میں دستیاب ہے۔
تازہ ترین خبروں کے لیے پی این آئی کا فیس بک پیج فالو کریں
