چینی کی قیمت میں ہوشرباء اضافہ

اسلام آباد : ملک کے مختلف شہروں میں چینی کی قیمتیں ایک بار پھر بڑھ گئیں اور فی کلو نرخ 220 روپے تک جا پہنچے۔

ادارہ شماریات کی دستاویزات کے مطابق گزشتہ ایک ہفتے میں سرگودھا میں چینی کی فی کلو قیمت میں 23 روپے تک اضافہ ہوا جبکہ کراچی اور حیدرآباد میں 5 روپے فی کلو تک اضافہ ریکارڈ کیا گیا۔ اس اضافے کے بعد چینی کی زیادہ سے زیادہ قیمت 220 روپے فی کلو ہو گئی ہے۔

دستاویز کے مطابق راولپنڈی، کراچی اور سرگودھا میں چینی کی قیمت 200 روپے فی کلو تک پہنچ گئی جبکہ حیدرآباد میں نرخ 190 سے بڑھ کر 195 روپے فی کلو ہو گئے۔

ادارہ شماریات کا کہنا ہے کہ اگرچہ مجموعی طور پر گزشتہ ہفتے چینی کی اوسط فی کلو قیمت میں 12 پیسے کی معمولی کمی ہوئی ہے، تاہم اوسط قیمت اب بھی 188 روپے 69 پیسے فی کلو ریکارڈ کی گئی ہے، جو ایک سال قبل 132 روپے 47 پیسے تھی۔

دوسری جانب مارکیٹ ذرائع کے مطابق لاہور میں چینی کی قیمت میں تیزی سے اضافہ ہوا ہے اور شہر کے مختلف علاقوں میں چینی 200 سے 220 روپے فی کلو کے درمیان فروخت کی جا رہی ہے۔