ٹماٹر عوام کی پہنچ سے دور، قیمت میں ہوشربا اضافہ

ملک بھر میں ٹماٹر کی قیمتوں نے نیا ریکارڈ قائم کر دیا ہے، بڑے شہروں میں نرخ آسمان سے باتیں کرنے لگے ہیں۔

جہلم میں ٹماٹر 100 روپے سے بڑھ کر 700 روپے فی کلو تک جا پہنچے ہیں، جبکہ شہریوں کا کہنا ہے کہ اب ٹماٹر خریدنا مشکل ہی نہیں بلکہ ناممکن ہوتا جا رہا ہے۔ بہت سے لوگ روزمرہ کھانوں میں ٹماٹر کا استعمال کم کرنے پر مجبور ہیں۔ گوجرانوالہ میں ٹماٹر 575 روپے فی کلو میں فروخت ہو رہے ہیں، جہاں دکاندار اس اضافہ کو حالیہ سیلاب کے اثرات کا نتیجہ قرار دے رہے ہیں۔ ان کے مطابق سپلائی میں نمایاں کمی کے باعث ہول سیل مارکیٹ میں بھی قیمتیں بڑھ گئی ہیں۔

فیصل آباد میں فی کلو قیمت 500 روپے، ملتان میں 450 روپے جبکہ لاہور میں 400 روپے فی کلو تک پہنچ گئی ہے، جو کہ حکومت کی مقرر کردہ 175 روپے کی حد سے کہیں زیادہ ہے۔ کوئٹہ میں ٹماٹر 300 سے 350 روپے فی کلو میں فروخت ہو رہے ہیں اور شہریوں کا کہنا ہے کہ ٹماٹر اب روزمرہ کی پہنچ سے باہر ہو چکے ہیں۔پشاور میں بھی حکومت کی مقرر کردہ 320 روپے فی کلو قیمت کے باوجود ٹماٹر 450 روپے فی کلو میں فروخت کیے جا رہے ہیں۔ تاجروں کے مطابق افغانستان سے تجارتی راستے بند ہونے کے باعث سپلائی مزید کم ہو گئی ہے۔

کراچی میں صورتحال سب سے زیادہ سنگین ہے، جہاں مختلف علاقوں میں ٹماٹر 500 سے 700 روپے فی کلو تک فروخت ہو رہے ہیں۔ شہریوں نے حکومت سے فوری نوٹس لینے اور قیمتوں میں استحکام لانے کے لیے اقدامات کا مطالبہ کیا ہے۔

تازہ ترین خبروں کے لیے پی این آئی کا فیس بک پیج فالو کریں

close