بجلی بلوں میں بڑی تبدیلی ، حکومت کا اہم فیصلہ

وفاقی حکومت نے بجلی کے پیک اور آف پیک آورز (Peak & Off-Peak Hours) کے اوقات میں تبدیلی کا فیصلہ کر لیا ہے۔ اس اقدام کا مقصد سولر سسٹمز کے بڑھتے ہوئے استعمال کے باعث بجلی کی طلب میں کمی سے پیدا ہونے والے مسائل کو حل کرنا ہے۔

نیپرا نے اس حوالے سے لیسکو سمیت دیگر تمام ڈسکوز کو “ٹائم آف یوز (TOU) ٹیرف” میں تبدیلی کے لیے مراسلے بھیج دیے ہیں۔ مراسلے میں تجویز دی گئی ہے کہ پیک آورز کو رات 11 بجے تک محدود کر دیا جائے۔ اس وقت بجلی کے پیک آورز شام 7 بجے سے رات 11 بجے تک تصور کیے جاتے ہیں، جب کہ رات 11 بجے کے بعد تمام اوقات کو آف پیک آورز میں شامل کیا جاتا ہے۔

سولر سسٹم لگانے والے صارفین پیک آورز میں بجلی کا استعمال کم کرتے ہیں، جس سے بجلی کی فروخت میں کمی اور پاور سیکٹر کو مالی نقصان کا سامنا ہے۔ حکومت نے ان اوقات میں مہنگے نرخوں پر بجلی فراہم کرنے کا ٹیرف نافذ کر رکھا ہے تاکہ بجلی کے استعمال میں کمی کی جا سکے۔

یہ فیصلہ پالیسی میں بڑی تبدیلی کے مترادف ہے، جس سے نہ صرف بجلی کے بلوں پر اثر پڑے گا بلکہ توانائی کے استعمال کے طریقہ کار میں بھی رد و بدل متوقع ہے۔