لاہور میں الیکٹرک ٹرام سروس کے روٹس کا تعین کر لیا گیا ہے، جس کے پہلے مرحلے میں ٹرام کو ہربنس پورہ سے ٹھوکر نیاز بیگ تک چلانے کا فیصلہ کیا گیا ہے۔
پنجاب حکومت نے شہر میں جدید، ماحول دوست اور پائیدار ٹرانسپورٹ نظام متعارف کرانے کے لیے الیکٹرک ٹرام کا آغاز کرنے کا منصوبہ بنایا ہے۔ پہلے مرحلے میں یہ سروس کینال روڈ پر متعارف کرائی جائے گی، جہاں ٹریفک میں خلل سے بچنے کے لیے ٹرام کا روٹ سڑک کے انتہائی بائیں جانب بنایا جائے گا۔ مسافروں کی سہولت کے پیش نظر بس اسٹاپس کے قریب سڑک کو بھی وسیع کیا جائے گا۔
ٹریفک کے بہاؤ کو بہتر بنانے کے لیے کینال روڈ کے انڈرپاسز کو سنگل لین میں ضم کرنے اور جیل روڈ انڈرپاس کی سمت کو بائیں سے دائیں منتقل کرنے پر بھی غور کیا جا رہا ہے۔
چین سے درآمد کی گئی یہ برقی ٹرام تین یونٹس پر مشتمل ہے، جو مکمل طور پر بجلی سے چلتی ہے۔ یہ ٹرام صرف 10 منٹ کی چارجنگ پر 25 سے 27 کلومیٹر تک سفر کر سکتی ہے اور اس میں 250 مسافروں کے بیٹھنے کی گنجائش ہے۔
پائلٹ پراجیکٹ کے تحت اس ٹرام کا تجرباتی آغاز لاہور ایئرپورٹ کے قریب ہو چکا ہے۔ سروس کے باقاعدہ آغاز کے بعد کرایہ مقرر کیا جائے گا، جبکہ جالو سے ہربنس پورہ تک زیرِ زمین سڑک بنانے کا منصوبہ بھی زیر غور ہے تاکہ شہر میں رابطے کو مزید بہتر بنایا جا سکے۔
محکمہ ٹرانسپورٹ منصوبے کی فزیبلٹی اور ٹرام روٹ کا تفصیلی جائزہ لے رہا ہے۔ حکام کا کہنا ہے کہ یہ منصوبہ لاہور کے پبلک ٹرانسپورٹ نظام کو جدید بنانے اور ماحول دوست شہری ٹرانسپورٹ کو فروغ دینے کی جانب ایک اہم پیش رفت ہے۔
تازہ ترین خبروں کے لیے پی این آئی کا فیس بک پیج فالو کریں
