اسلام آباد: آل پاکستان سیمنٹ مینوفیکچررز ایسوسی ایشن (APCMA) کے جاری کردہ تازہ ترین اعداد و شمار کے مطابق جولائی 2025 کے دوران سیمنٹ کی مجموعی فروخت میں 30 فیصد کا نمایاں اضافہ ریکارڈ کیا گیا۔
رپورٹ کے مطابق جولائی 2025 میں مجموعی طور پر 3.997 ملین ٹن سیمنٹ فروخت کی گئی، جبکہ گزشتہ سال جولائی 2024 میں یہ مقدار 3.071 ملین ٹن رہی تھی۔ مقامی سطح پر بھی سیمنٹ کی طلب میں نمایاں اضافہ دیکھا گیا۔ جولائی 2025 کے دوران مقامی مارکیٹ میں سیمنٹ کی فروخت 2.988 ملین ٹن رہی جو کہ جولائی 2024 کے 2.524 ملین ٹن کے مقابلے میں 18.40 فیصد زیادہ ہے۔
برآمدات کے شعبے میں بھی شاندار کارکردگی سامنے آئی۔ جولائی 2024 میں سیمنٹ کی برآمدات 0.547 ملین ٹن تھیں، جو جولائی 2025 میں 84.21 فیصد اضافے کے ساتھ 1.008 ملین ٹن تک پہنچ گئیں۔ شمالی علاقوں میں واقع سیمنٹ فیکٹریوں نے بھی مثبت کارکردگی دکھائی، جہاں جولائی 2025 کے دوران 2.650 ملین ٹن سیمنٹ فروخت ہوا، جو کہ گزشتہ سال کے 2.253 ملین ٹن کے مقابلے میں 17.61 فیصد زیادہ ہے۔
ایسوسی ایشن کے ترجمان نے بتایا کہ ملک کے مختلف حصوں میں خراب موسم کے باوجود سیمنٹ انڈسٹری نے نئے مالی سال کا آغاز مثبت انداز میں کیا ہے۔ انہوں نے امید ظاہر کی کہ معاشی اشاریوں میں بہتری کے ساتھ آئندہ مہینوں میں سیمنٹ صنعت کی ترقی کا رجحان برقرار رہے گا۔
تازہ ترین خبروں کے لیے پی این آئی کا فیس بک پیج فالو کریں
