الیکٹرک گاڑیوں اور موٹر سائیکلوں سے متعلق نئی سکیم تیار

درآمدی بل میں کمی اور ماحولیاتی چیلنجز سے نمٹنے کے لیے حکومت نے ایک بڑا قدم اٹھاتے ہوئے ماحول دوست الیکٹرک گاڑیوں اور موٹر سائیکلوں کے فروغ کا فیصلہ کیا ہے۔ وزیراعظم شہباز شریف یومِ آزادی کے موقع پر سستے الیکٹرک بائیکس اسکیم کا باضابطہ افتتاح کریں گے۔

اس اسکیم کے تحت عوام کو رعایتی نرخوں پر الیکٹرک موٹر سائیکلیں فراہم کی جائیں گی، جس کے لیے حکومت نے بجٹ میں 9 ارب روپے کی سبسڈی مختص کی ہے۔ ہر ای بائیک پر 65 ہزار روپے سبسڈی دی جائے گی، جبکہ باقی رقم بغیر سود کے بینک فراہم کریں گے۔ الیکٹرک موٹرسائیکلوں کے لیے آن لائن رجسٹریشن کی سہولت فراہم کی جائے گی، اور اگر درخواستیں مقررہ حد سے بڑھ گئیں تو قرعہ اندازی کی جائے گی۔

الیکٹرک وہیکلز پالیسی کے مطابق حکومت کا ہدف ہے کہ 2030 تک ملک میں کم از کم 20 لاکھ ای بائیکس سڑکوں پر ہوں۔ اس کے علاوہ 53,950 ای رکشے، 99,155 کاریں، 2,238 بسیں اور 2,996 ٹرک بھی شامل ہوں گے۔ مجموعی طور پر آئندہ پانچ سال میں 22 لاکھ 13 ہزار 115 الیکٹرک گاڑیاں متعارف کرانے کا منصوبہ ہے۔

اس منصوبے کے پہلے مرحلے میں ملک بھر میں 40 فاسٹ چارجنگ اسٹیشنز قائم کیے جائیں گے، اور اسلام آباد کو الیکٹرک گاڑیوں کے لحاظ سے ماڈل سٹی بنانے کا ہدف مقرر کیا گیا ہے۔ اس مقصد کے لیے وفاقی دارالحکومت کے تمام پیٹرول پمپوں پر چارجنگ پوائنٹس نصب کیے جائیں گے۔