سونے چاندی کی قیمتوں میں کمی یا اضافہ ؟ جانئے

ملک میں گزشتہ روز سونے کی قیمت میں اضافے کے بعد آج اس کی قیمت میں استحکام دیکھا گیا، البتہ چاندی کی قیمت میں معمولی اضافہ ریکارڈ کیا گیا ہے۔

سرکاری خبر رساں ادارے اے پی پی کے مطابق، آل پاکستان صرافہ جیمز اینڈ جیولرز ایسوسی ایشن کا کہنا ہے کہ منگل کے روز 24 قیراط فی تولہ سونے کی قیمت بغیر کسی رد و بدل کے 3 لاکھ 61 ہزار 200 روپے پر برقرار رہی۔

اسی طرح 24 قیراط 10 گرام سونا 3 لاکھ 9 ہزار 671 روپے اور 22 قیراط 10 گرام سونا 2 لاکھ 83 ہزار 865 روپے پر مستحکم رہا۔ یاد رہے کہ گزشتہ روز سونے کی فی تولہ قیمت میں 3 ہزار 600 روپے کا اضافہ ہوا تھا۔

دوسری جانب، چاندی کی قیمتوں میں اضافہ ہوا، جس کے مطابق فی تولہ چاندی 23 روپے بڑھ کر 4 ہزار 35 روپے ہو گئی جبکہ 10 گرام چاندی کی قیمت 20 روپے اضافے سے 3 ہزار 459 روپے ہو گئی۔

ایسوسی ایشن کے مطابق عالمی منڈی میں بھی سونے کی قیمت 3 ہزار 387 ڈالر فی اونس پر برقرار رہی، جبکہ چاندی کی قیمت میں 0.23 ڈالر اضافہ ہوا اور وہ 38.88 ڈالر فی اونس تک پہنچ گئی۔