مہنگائی کا طوفان بے قابو، برائلر مزید کتنا مہنگا ہوگیا؟

لاہور(پی این آئی) مہنگائی کے باعث ہر شخص پریشان ہے اور حکومت کو بھی مہنگائی کنٹرول کرنے کی کوششوں میں کوئی خاطر خواہ کامیابی نہیں مل سکی۔مرغی کے گوشت سمیت سبزیوں کی قیمتوں میں بھی اضافہ ہو گیا۔

لاہور میں برائلر گوشت 22 روپے فی کلو مہنگا ہو گیا، برائلر گوشت 541 روپے کلو فروخت ہورہا ہے جبکہ فارمی انڈوں کے نرخ ایک روپے اضافے سے 253 روپے فی درجن تک پہنچ گئے۔دوسری جانب مارکیٹ رپورٹ کے مطابق ٹماٹر کی قیمت میں 15روپے اضافے کے بعد سرکاری نرخ 160 روپے کلو مقرر ہوا، مارکیٹ میں ٹماٹر 180 روپے کلو فروخت ہو رہا ہے، آلو کا نرخ چار روپے بڑھ کر 83 روپے کلو مقرر ہوا، مارکیٹ میں آلو 100 روپے کلو تک پہنچ گیا۔

رپورٹ میں بتایا گیا کہ لہسن کا سرکاری نرخ 25 روپے اضافے سے 395 روپے کلو مقرر ہے جبکہ مارکیٹ میں لہسن 500 روپے کلو فروخت ہورہا ہے، ادرک کا سرکاری نرخ 10 روپے اضافے سے 620 روپے کلو مقرر ہے، مارکیٹ میں ادرک 800 روپے کلو بیچا جارہا ہے۔لیموں 290 روپے کی بجائے 400 روپے کلو تک بیچے جا رہے ہیں، پھول گوبھی اور بند گوبھی 120 روپے کلو فروخت ہوتی رہی۔