انڈس موٹر نے کتنے روز کیلئے پلانٹ بند کرنے کا فیصلہ کر لیا

اسلام آباد (پی این آئی) معاشی صورتحال کے باعث نگران حکومت کے دور میں بھی آٹو انڈسٹریز کے پلانٹس بند ہونے کا سلسلہ جاری ہے، انڈس موٹر کمپنی نے غیر موافق معاشی صورتحال کے سبب پیداواری سرگرمیاں 2 ہفتے کے لیے معطل کرنے کا اعلان کر دیا۔ تفصیلات کے مطابق انڈس موٹر کمپنی کی جانب سے کہا گیا ہے کہ خراب معاشی حالات کے پیش نظر لوگوں کی قوت خرید میں کمی اور وفاقی حکومت کی جانب سے عائد کردہ اضافی ٹیکسز اور ڈیوٹیز کی وجہ سے گاڑیوں کی طلب میں مسلسل تنزلی ہو رہی ہے

، پیداوار معطل کرنے کا فیصلہ کم طلب اور انوینٹری کی کم سطح کے سبب کیا گیا ہے،انڈس موٹر کمپنی نے پیداواری سرگرمیاں اس سے پہلے بھی 21 جولائی تا 3 اگست تک معطل کر دی تھیں، کمپنی نے رواں برس جولائی میں ایک ہزار 368 کاریں اور ایل سی ویز فروخت کی گئیں جبکہ جولائی 2022 میں یہ تعداد 2 ہزار 375 ریکارڈ کی گئی تھی۔ نگران حکومت کے دور میں پاک سوزوکی موٹر کمپنی لمیٹڈ پہلی کمپنی تھی،

جس نے اسپیئر پارٹس کی قلت کے سبب 18 سے 31 اگست تک موٹرسائیکل پلانٹ بند کرنے کا اعلان کیا،رپورٹ میں بتایا گیا کہ 7 کروڑ 6 لاکھ ڈالر کے کمپلیٹلی ناک ڈاؤن کٹ (سی کے ڈی)کی درآمدات کی بعد سے رواں مہینے گاڑیوں کی پیداوار بہتر ہونے کی امید ہے، جون میں 4 کروڑ ڈالر جبکہ جولائی 2022 میں 6 کروڑ 70 لاکھ ڈالر کے سی کے ڈی درآمدات کیے گئے تھے۔