کراچی (پی این آئی) انٹر بینک میں کاروباری ہفتے کے پانچویں روز ڈالر کی قیمت میں کمی ریکارڈ کی گئی ہے۔سٹیٹ بینک آف پاکستان کی جانب سے جاری کئے گئے اعدادوشمار کے مطابق انٹربینک میں ڈالر کی قدر میں 16 پیسے کی کمی ریکارڈ کی گئی ہے۔ فاریکس ڈیلرز کے مطابق انٹربینک میں ڈالر 159.33 سے کم ہو کر 159.17 روپے پر بند ہوا ہے۔ دوسری جانب ورلڈ بینک نے شرائط پوری نہ ہونے پر 400 ملین ڈالر کا قرضہ روک لیا۔عالمی بینک نے گذشتہ ماہ پاکستان کو 400 ملین ڈالر کا قرضہ دینے پر آمادگی ظاہر کی تھی تاہم جن شرائط پر اتفاق ہوا تھا ان کی عدم تکمیل پر قرض کا اجرا روک دیا گیا ہے۔ حکومت پاکستان نے یہ قرض غیرملکی زرمبادلہ کے ذخائر بڑھانے کے لیے حاصل کرنا تھا۔فریقین کے دستخط شدہ معاہدے سے ظاہر ہوتا ہے کہ ورلڈ بینک نے نئی اضافی شرائط پر عمل درآمد کی ڈیڈ لائن میں تین ماہ کا اضافہ کردیا ہے۔ اس مدت میں شرائط پر عمل درآمد نہ کیا گیا تو قرض کا معاہدہ ختم کردیا جائے گا۔ ورلڈ بینک کی سب سے اہم شرائط جو عمل درآمد کی منتظر ہے وہ انٹیگریٹڈ کیپسٹی ایکسپینشن پلان ( IGCEP ) کی حتمی منظوری ہے۔28 جون کو ورلڈ بینک کے بورڈ آف ڈائریکٹرز نے پاکستان کے لیے دو پروگراموں کی منظوری دی تھی۔ ان میں پاکستان پروگرام فار افورڈایبل اینڈ کلین انرجی ( PACE ) اور دوسرا سیکیورنگ ہیومن انویسٹمنٹ ٹو فوسٹر ٹرانسمیشن (SHIFT-II) شامل تھے۔ دونوں پروگراموں کی مالیت 800ملین ڈالر ہے۔سرکاری ذرائع نے ایکسپریس ٹریبیون کو بتایا کہ ورلڈ بینک نے شفٹ پروگرام کے تحت 400 ملین ڈالر جاری کردیے مگر شرائط پر عمل درآمد میں تاخیر کی وجہ سے دوسرے پروگرام کے لیے قرض کا اجرا روک لیا۔ اس ضمن میں سیکریٹری خزانہ یوسف خان نے کوئی جواب نہیں دیا۔ورلڈ بینک نے قرض کے اجرا کے لیے مذکورہ بالا کے علاوہ بھی کوئی نصف درجن اضافی شرائط عائد کی ہیں جن میں سے کچھ پر مشترکہ مفادات کونسل کا اجلاس بلا کر عمل درآمد کیا گیا تھا۔
