اسلام آباد(آئی این پی) وزیر اعظم کے معاون خصوصی شہباز گل نے کہا ہے کہ اپوزیشن کا 3 سالہ خراب معیشت کا بیانیہ دفن ہو چکا ہے، عوامی امنگوں سے متصل بجٹ کو روکنے کی بات کرنا بھی شرمناک ہے، ہفتہ کو چیئرمین پیپلز پارٹی بلاول بھٹو کے بیان پر ردعمل کا اظہار کرتے ہوئے معاون خصوصی شہباز گل نے کہا کہ بدترین معیشت کے ذمہ داروں نے معاشی ترقی کی راہ میں روڑے اٹکائے لیکن اس کے باوجود آج زرمبادلہ کے ذخائر 22 ارب ڈالر تک پہنچ چکے ہیں اور پاکستان اسٹاک ایکسچینج پچھلے 4 سال کی سب سے بلند ترین سطح پر پہنچی ہے،شہباز گل نے کہا کہ پاکستان کی پچھلے 10ماہ کی برآمدات 21ارب ڈالر رہیں جبکہ موڈیز نے پاکستان کی جی ڈی پی گروتھ کا تخمینہ 4.64فیصد لگایا ہے،انہوں نے کہا کہ ملک ترقی کی راہ پر گامزن ہو چکا ہے اور اب عوام تک ثمرات پہنچانے کا وقت ہے۔۔۔۔۔
گورنر سٹیٹ بینک نے مہنگائی کی اصل وجہ کا انکشاف کر دیا
کراچی(آئی این پی) گورنر سٹیٹ بینک ڈاکٹر رضا باقر نے کہا ہے کہ مہنگائی کو مدنظر رکھیں تو حقیقی شرح سود منفی ہے، مہنگائی کی وجہ شرح سود نہیں سپلائی کے معاملات ہیں۔ جمعہ کو نجی ٹی وی کے ساتھ میں گفتگو کرتے ہوئے گورنر سٹیٹ بینک نے کہا کہ مانیٹری پالیسی معاشی ترقی کی بھرپور معاونت کررہی ہے، بنیادی شرح سود 7 فیصد، مہنگائی کی رفتار 11 فیصد ہے۔انہوں نے کہا کہ مہنگائی پورے مالی سال 9 فیصد تک محدود رہ سکتی ہے۔ اگر مہنگائی کو مدنظر رکھیں تو حقیقی شرح سود منفی ہے۔ معیشت کی مالی معاونت کا ہاتھ کھینچا تو قیمت ادا کرنی ہوگی، کورونا قابو ہونے پر ہی مالی مدد ختم کرنے کا سوچا جا سکتا ہے، معیشت میں ابھی بھی” اوور ہیٹنگ” کا خطرہ نہیں ہے۔گورنر سٹیٹ بینک نے کہا کہ مہنگائی کی وجہ شرح سود نہیں سپلائی کے معاملات ہیں۔ بجلی ،چکن اور ڈیری کی قیمت پر شرح سود کم نہیں ہوسکتی، ہمارا نقطہ یہ ہے کہ شرح سود میں کوئی تبدیلی نہ کی جائے، اب بھی مستقبل کے حوالے سے رہنمائی فراہم کی ہے۔ڈاکٹر رضا باقر کا کہنا تھا کہ کورونا ماحول میں 2 ہزار ارب روپے کے مالیاتی پیکیج دیئے، ٹیرف کے تحت 450 ارب سستے قرضوں کی منظوری دی، کافی سارے مالیاتی پیکیج دیئے ہیں جو پائپ لائن میں ہے۔بات کو جاری رکھتے ہوئے ان کا کہنا تھا کہ عالمی مالیاتی ادارے (آئی ایم ایف)نے 1.5 جبکہ ہم نے3 فیصد معاشی ترقی کی امید ظاہر کی، گاڑیاں ، سیمنٹ بجلی کھپت سے معاشی رفتار کا اندازہ ہورہا تھا۔ تازہ ترین معاشی اعداد و شمار توقعات سے بھی بہتر آئے ہیں۔انہوں نے کہا کہ اس بار عالمی ادائیگیوں کا پلڑا وصولیوں سے ہلکا ہے، 4 فیصد ترقی کے ساتھ کرنٹ اکانٹ سرپلس ہے۔ ماضی میں 4 فیصد ترقی ہوتی تو کرنٹ اکانٹ خسارہ دکھاتا تھا، موجودہ معاشی ترقی پائیدار بنیادوں پر استوار ہو رہی ہے۔ ترقی کیلئے سرمایہ کاری و پیداواری صلاحیت کو بڑھا نا ہے۔ ٹیرف کے تحت 3 ارب ڈالر کی صرف مشینری میں سرمایہ لگا۔گورنر سٹیٹ بینک نے کہا کہ ہر آئی ایم ایف پروگرام کا مقصد معاشی استحکام وترقی ہوتا ہے ، ملک میں ترقی نہیں ہوگی تو آئی ایم ایف قرضہ واپس کیسے لے گی۔ ہم معاشی استحکام حاصل کرنے بعد ترقی کی جانب دیکھ رہے ہیں۔ کووڈ کے باوجود قرضوں کا معاشی تناسب نہ ہونے کے برابر بڑھا، معیشت میں آئی ایم ایف پروگرام کے پہلے فیز میں کامیاب ہوئے۔ اب مقصد ترقی کی رفتا بڑھانا ہے ،جس میں آئی ایم ایف ساتھ ہے۔ڈاکٹر رضا باقر نے کہا کہ عالمی سرمایہ کار کا معاشی کارکردگی جانچنا ہی اصل امتحان ہوتا ہے، قرضہ لینے پر پتہ چلتا ہے عالمی انویسٹر کس ریٹ پر قرضہ دے رہا ہے۔ کم شرح سود پر قرضہ عالمی انویسٹرز کے ملک پر اعتماد کی عکاسی ہے۔ واپڈا بانڈز کی نیلامی عالمی کیپٹل مارکیٹ میں بہتر تاثرکا ثبوت ہے۔ان کا کہنا تھا کہ یوروبانڈز کی پرفارمنس نے بھی ساکھ بہتر ہونے کی گواہی دی ہے۔ انٹرنیشنل مارکیٹ سے رجوع کرنے کا فیصلہ وزارت خزانہ کرتی ہے۔ مالیاتی اداروں کے علاوہ اب عالمی مارکیٹ سے بھی قرضے لے سکتے ہیں۔۔۔۔۔
تازہ ترین خبروں کے لیے پی این آئی کا فیس بک پیج فالو کریں
