بڑا جھٹکا، ن لیگ نے پی ٹی آئی کی بڑی وکٹ گرا دی

آزاد جموں و کشمیر کی سیاست میں اہم پیشرفت ہوئی ہے جہاں مسلم لیگ ن نے پی ٹی آئی کی ایک بڑی وکٹ حاصل کرلی ہے۔ رپورٹس کے مطابق سینئر سیاسی رہنما سردار میر اکبر خان نے مسلم لیگ ن میں شمولیت کے لیے رضامندی ظاہر کر دی ہے اور اس سلسلے میں وہ ن لیگی قیادت سے ملاقات بھی کر چکے ہیں۔ مسلم لیگ ن کی مرکزی کمیٹی نے سردار میر اکبر خان کی شمولیت کی باقاعدہ منظوری دے دی ہے۔

ذرائع کے مطابق شاہ غلام قادر کی قیادت میں ایک اعلیٰ سطحی وفد نے سردار میر اکبر خان سے ملاقات کی جس میں مستقبل کی سیاسی صورتحال اور انتخابی حکمت عملی پر تفصیلی بات چیت کی گئی۔ ملاقات کے دوران سردار میر اکبر خان نے کہا کہ وہ کارکنوں سے مشاورت کر رہے ہیں اور جلد مسلم لیگ ن میں شمولیت کا اعلان کریں گے۔ ان کا کہنا تھا کہ فکری اور نظریاتی طور پر وہ مسلم لیگ ن کے قائد میاں محمد شریف کے زیادہ قریب ہیں اور مسلم لیگ ن نے ہمیشہ پاکستان اور آزاد جموں و کشمیر کے عوام کی خدمت کی ہے۔

انہوں نے کہا کہ وزیر اعظم شہباز شریف اور فیلڈ مارشل عاصم منیر موجودہ مسائل کے حل کے لیے سنجیدہ کوششیں کر رہے ہیں۔ ن لیگی ذرائع کا دعویٰ ہے کہ سردار میر اکبر خان اور ان کے ساتھی جلد مسلم لیگ ن میں شامل ہوکر عوامی خدمت کا نیا سفر شروع کریں گے جس سے خطے میں سیاسی توازن پر نمایاں اثر پڑے گا۔