سیاست میں نیا موڑ، ن لیگ کا پیپلز پارٹی کو ووٹ دینے سے انکار

اسلام آباد: آزاد کشمیر میں ان ہاؤس تبدیلی کے معاملے پر مسلم لیگ (ن) کے اہم اجلاس کی اندرونی تفصیلات سامنے آگئی ہیں۔

ذرائع کے مطابق ن لیگ نے آزاد کشمیر میں حکومت کی تبدیلی سے متعلق مشاورت مکمل کرلی ہے اور فیصلہ کیا ہے کہ نئے وزیرِاعظم کے انتخاب میں پیپلز پارٹی کے امیدوار کو ووٹ نہیں دیا جائے گا۔ اجلاس میں واضح کیا گیا کہ تحریکِ عدم اعتماد اور قائدِ ایوان کے انتخاب دو الگ معاملات ہیں۔ ن لیگ حکومت کی تبدیلی میں پیپلز پارٹی کی حمایت کرے گی مگر نئی حکومت میں شامل نہیں ہوگی۔

ذرائع کے مطابق اجلاس میں فیصلہ کیا گیا کہ پیپلز پارٹی سے جلد انتخابات کے حوالے سے مشاورت کی جائے گی، جبکہ سیاسی رابطہ کمیٹی نے آزاد کشمیر کی پارلیمانی پارٹی کو طے شدہ فارمولے پر اعتماد میں لیا۔اجلاس میں آئندہ کی سیاسی حکمتِ عملی پر بھی غور ہوا اور اس بات پر اتفاق کیا گیا کہ مسلم لیگ (ن) آزاد کشمیر میں کسی نئی حکومت کا حصہ نہیں بنے گی۔
مزید بتایا گیا ہے کہ سیاسی رابطہ کمیٹی نے آزاد کشمیر کی قیادت سے آئندہ کے لائحہ عمل پر تجاویز طلب کرلی ہیں، جن کی تفصیلات وزیرِاعظم شہباز شریف کو وطن واپسی پر پیش کی جائیں گی۔

ذرائع کے مطابق اجلاس میں احسن اقبال، رانا ثناءاللّٰہ، وزیرِ امورِ کشمیر انجینئر امیر مقام، ن لیگ آزاد کشمیر کے صدر شاہ غلام قادر، راجا فاروق حیدر، طارق فاروق، مشتاق منہاس اور دیگر مرکزی رہنما شریک ہوئے۔