تحریک انصاف کی خوشیاں دھری کی دھری رہ گئیں، جے یو آئی نے پی ٹی آئی کیساتھ اتحاد کی تردید کردی

مظفر آباد(پی این آئی)پی ٹی آئی کیساتھ کوئی اتحاد نہیں ہوا، جے یو آئی کی آزاد کشمیر الیکشن میں تحریک انصاف کے حق میں دستبرداری کی تردید، جے یو آئی رہنما قاضی محمود الحسن کے فیصلے سے لاتعلقی کا اعلان کر دیا۔ ترجمان جے یو آئی اسلم غوری نے آزادکشمیر میں پی ٹی آئی کے حق میں دستبرداری کی تردیدکردی۔ جے یو آئی ترجمان کاکہناہے کہ قاضی محمود الحسن جے یو آئی کشمیر کے ذمے دار نہیں ہیں ،جے یو آئی آزادکشمیر کے امیر مولانا سعید یوسف ہیں ، ترجمان کاکہناتھا کہ جمعیت علمااسلام کا پی ٹی آئی کے ساتھ کوئی اتحاد نہیں ہوا ،چند افراد کے متوازی گروپ کا جے یوآئی سے کوئی تعلق نہیں ہے۔واضح رہے کہ آج وزیراعلیٰ پنجاب عثمان بزدار کے معاون خصوصی سردار تنویر الیاس سے آل جموں کشمیر جے یو آئی کے وفد نے قاضی محمودالحسن کی سربراہی میں ملاقات کی ، جس میں جے یو آئی نے آزاد کشمیر الیکشن میں پاکستان تحریک انصاف کی غیر مشروط حمایت اور آل جموں و کشمیر جے یو آئی کے تمام امیدواروں کو پی ٹی آئی امیدواروں کے حق میں دستبردار کرانے کا اعلان کیا۔اس موقع پر قاضی محمود الحسن نے کہا کہ تمام حلقوں میں پی ٹی آئی کو سپورٹ کریں گے، دونوں جماعتوں کے اتحاد سے ریاست میں ساز گار ماحول پیدا ہوگا جب کہ ملاقات کے دوران گفتگو کرتے ہوئے سردار تنویر الیاس نے کہا کہ آزادکشمیر کی سیاست میں مذہبی جماعتوں کا ایک اہم کردار ہے، جموں کشمیر جمعیت علمائے اسلام کا ہر حلقے میں ووٹ بینک موجود ہے، آزاد کشمیر کے عام انتخابات میں ان کے ساتھ مل کر الیکشن لڑیں گے۔علاوہ ازیں پاکستان مسلم لیگ ن کے اہم رہنما نے الیکشن سے قبل تحریک انصاف میں شمولیت کا اعلان کر دیا ، آزاد کشمیر کابینہ کے اہم رکن سردار میر اکبر خان نے مسلم لیگ ن سے علیحدگی کا اعلان کر دیا ، انہوں نے پی ٹی آئی میں شمولیت اختیار کرلی ، سردار میر اکبر خان نے پاکستان تحریک انصاف کے چیف آرگنائزر سینیٹر سیف اللہ نیازی سے ملاقات کی جس کے دوران ن لیگ سے علحیدگی کا اعلان کیا، ملاقات میں وزیر امور کشمیر و گلگت بلتستان علی امین گنڈا پور بھی موجود تھے ، سردار اکبر خان نے اس موقع پر وزیراعظم عمران خان کی قیادت اور پی ٹی آئی کی منشور پر اعتماد کا اظہار بھی کیا جب کہ پی ٹی آئی کی جانب سے سردار میر اکبر خان کو ایل اے 16 باغ سے امیدوار نامزد کرنے کا اعلان کیا ہے۔دوسری طرف آزاد کشمیر قانون ساز اسمبلی کے گیارویں عام انتخابات کا شیڈول جاری کر دیا گیا ہے ، آزاد کشمیر کی قانون ساز اسمبلی کے لیے انتخابات 25 جولائی کو ہوں گے ، امیدوار 21 جون شام 4 بجےتک کاغذات نامزدگی داخل کروا سکتے ہیں، 26 جون تک کاغذات کی جانچ پڑتال کی جائے گی، 27 جون تک اعتراضات داخل کروائے جا سکیں گے، 2 جولائی تک کاغذات کی واپسی ہو سکے گی، 3 جولائی کوامیدواروں کی حتمی فہرست آویزاں ہوگی، اور امیدارواں کو انتخابی نشانات 4 جولائی کو الاٹ ہوں گے۔