اسلام آباد (پی این آئی) اپوزیشن اتحاد کے سربراہ محمود خان اچکزئی نے حکومتی کمیٹیوں سے استعفیٰ دینے کا اعلان کر دیا، تحریک انصاف سے بھی کہتا ہوں کہ یہ بھی حکومتی کمیٹیاں چھوڑ دیں، میں تو پہلے دن سے کہہ رہا ہوں کہ یہ جعلی پارلیمنٹ ہے، پارلیمنٹ ہاؤس کے باہر میڈیا سے گفتگو کرتے ہوئے انہوں نے کہا کہ میں تمام کمیٹیوں سے استعفیٰ دیتا ہوں جن کا حکومت حصہ ہے۔
ایسی جعلی پارلیمنٹ کی بنائی گئی کسی کمیٹی میں نہیں بیٹھوں گا۔پی ٹی آئی کا مینڈیٹ چرایا گیا ہے۔ تاریخ میں کبھی بھی آئی ایم ایف کا وفد عدالت میں نہیں گیا تھا۔اس موقع پر محمود خان اچکزئی نے پاکستان تحریک انصاف کو مشورہ دیتے ہوئے کہا ہے کہ ہمیں پارلیمنٹ کے باہر اپنا ایوان لگانا چاہئے جس کا سپیکر اسدقیصر کو بنایا جائے۔ان کا کہنا تھا کہ ہمارے ممبران کی تعداد سو سے زائد ہیں وہ سب اس ایوان میں موجود ہوں اور عوام کو ساری صورتحال بتائیں کہ یہ عوام کی اصل نمائندہ جماعت ہے۔
عوام کو بتایا جائے کہ پی ٹی آئی کے مینڈیٹ پر کیسے ڈاکہ ڈالا گیا۔عوام کو معیشت کی اصل صورتحال کے بارے میں بتایا جائے۔عوام کو بتایا جائے کہ معیشت میں بہتری کے حکومتی دعوے جھوٹ ہیں۔ میڈیا سے گفتگو کرتے ہوئے اپوزیشن اتحاد کے سربراہ محمود خان اچکزئی کا مزید کہنا تھا کہ ترکیہ میں آرمی چیف کا بہت رول تھا جس نے ایردوان کو عہدے سے ہٹایا تھالیکن وہاں کی عوام اپنے گھروں سے باہرنکلی اورانہوں نے آئین کا ساتھ دیا اور طیب ایردوان کو دوبارہ عہدے پر پہنچایادیا۔
اس موقع پر گفتگو کرتے ہوئے سنی اتحاد کونسل کے سربراہ صاحبزادہ حامد رضا کا کہنا تھا کہ ہم نے آج بھر پور تیاری کی تھی کہ ہم تمام مسائل پر پارلیمنٹ میں بات کریں گے لیکن ایوان میں ہمیں موقع نہیں دیا گیااگر آپ کو ٹکرانے کا شوق ہے تو پھر ہم آرہے ہیں ٹکرانے۔ان کا یہ بھی کہنا تھا کہ ایک سال کے اندر پارلیمنٹ کی ناکامی اس سے زیادہ تاریخ میں نہیں ہوئی لیکن اس سال میں پارلیمنٹ میں حملہ ہوا اسٹینڈنگ کمیٹیوں کے ایجنڈے بدل دئیے گئے۔ہم ایوان میں بولنا نہیں دیاگیا جس کی ہم مذمت کرتے ہیں۔
تازہ ترین خبروں کے لیے پی این آئی کا فیس بک پیج فالو کریں
