بھارتی صدر دروپدی مورو کے ہیلی کاپٹر کے لینڈ کرتے ہی ہیلی پیڈ کا ایک حصہ زمین میں دھنس گیا، تاہم بھارتی صدر اس واقعے میں مکمل طور پر محفوظ رہیں۔ یہ واقعہ بدھ کے روز اس وقت پیش آیا جب وہ صابری مالا مندر میں حاضری کے لیے کیرالہ پہنچی تھیں۔
پولیس ذرائع کے مطابق صدر کے ہیلی کاپٹر کی لینڈنگ اصل میں نیلاکل (پمبا کے قریب) پر ہونی تھی، لیکن خراب موسم کے باعث آخری لمحات میں مقام تبدیل کر کے پرامادم میں کی گئی۔
حکام کا کہنا ہے کہ نیا ہیلی پیڈ منگل کی رات دیر گئے راجیو گاندھی انڈور اسٹیڈیم کے اندر تیار کیا گیا تھا، تاہم کنکریٹ مکمل طور پر سیٹ نہیں ہو سکا تھا، جس کے باعث ہیلی کاپٹر کے وزن سے زمین دھنس گئی۔
ایک سینئر پولیس افسر کے مطابق، کنکریٹ پوری طرح خشک نہیں ہوا تھا، اس لیے ہیلی کاپٹر کے پہیوں کے نیچے دباؤ سے گڑھے بن گئے۔
جب بھارتی صدر مورو اپنی گاڑی کے ذریعے پمبا روانہ ہو گئیں، تو پولیس اور فائر بریگیڈ اہلکاروں کو انڈین ایئر فورس کے Mi-17 ہیلی کاپٹر کے پہیے دھنسے ہوئے حصے سے نکالتے دیکھا گیا۔ واقعے میں کسی جانی نقصان کی اطلاع نہیں ملی۔
تازہ ترین خبروں کے لیے پی این آئی کا فیس بک پیج فالو کریں
