پاکستان سے جنگ نہیں ہونی چاہیے، امریکی صدر کا مودی سے ٹیلیفونک رابطہ

واشنگٹن: امریکی صدر ڈونلڈ ٹرمپ نے انکشاف کیا ہے کہ انہوں نے بھارتی وزیراعظم نریندر مودی کو صاف الفاظ میں کہہ دیا تھا کہ پاکستان سے جنگ نہیں ہونی چاہیے۔

اوول آفس میں دیوالی کی تقریب کے دوران صحافیوں سے گفتگو کرتے ہوئے صدر ٹرمپ نے بتایا کہ ان کی بھارتی وزیراعظم سے ٹیلیفونک بات چیت ہوئی، جس میں تجارت سمیت کئی امور پر تبادلہ خیال کیا گیا۔ ٹرمپ کے مطابق، وہ مسائل کو جنگ کے بجائے تجارت کے ذریعے حل کرنے کے حامی ہیں۔ انہوں نے دعویٰ کیا کہ اس گفتگو کے دوران مودی کو واضح پیغام دیا کہ پاکستان کے ساتھ جنگ سے گریز کیا جائے۔

امریکی صدر نے مزید کہا کہ انہوں نے اب تک تجارت کے ذریعے آٹھ جنگیں رکوا دی ہیں، جن میں پاکستان اور بھارت کے درمیان ممکنہ تصادم بھی شامل ہے۔ ٹرمپ کے بقول، “جب پاک بھارت کشیدگی عروج پر تھی اور دونوں جانب سات طیارے گرائے جا چکے تھے، میں نے دونوں ممالک کو فون کر کے خبردار کیا کہ اگر آپ نے جنگ کی تو امریکا آپ سے تجارت بند کر دے گا۔”

انہوں نے کہا کہ “24 گھنٹوں کے اندر دونوں ملکوں کے رہنماؤں نے مجھے کال کر کے بتایا کہ وہ جنگ نہیں چاہتے۔” یاد رہے کہ صدر ٹرمپ اس سے قبل بھی کئی بار پاک بھارت جنگ رکوانے کا کریڈٹ لے چکے ہیں۔