لندن: برطانیہ نے موٹاپے کی بڑھتی شرح پر قابو پانے کے لیے غیر صحت مند کھانے پینے کی اشیا پر دی جانے والی ’بائے ون گیٹ ون فری‘ اور دیگر پروموشنل ڈیلز پر پابندی عائد کردی ہے۔
غیر ملکی میڈیا کے مطابق اب سپر مارکیٹس، ہائی اسٹریٹ دکانوں اور آن لائن ریٹیلرز پر جَنک فوڈ کے حوالے سے ’ملٹی بائی‘ یا قیمت میں کمی کی ڈیلز دستیاب نہیں ہوں گی۔ برطانوی نشریاتی ادارے کے مطابق یہ فیصلہ کئی برسوں سے زیر غور تھا، تاہم معاشی دباؤ کے باعث مؤخر ہوتا رہا۔ حکام کا کہنا ہے کہ یہ اقدام موٹاپے خصوصاً بچوں کے موٹاپے کے خلاف جنگ میں ایک اہم پیش رفت ہے۔
حکومت نے ریسٹورنٹس اور کیفیز میں مخصوص مشروبات کی مفت ’ری فِل‘ آفرز پر بھی پابندی لگا دی ہے، جبکہ اگلے مرحلے میں جنوری سے رات 9 بجے سے پہلے ٹی وی پر اور مکمل طور پر آن لائن جَنک فوڈ کی تشہیر بھی بند کر دی جائے گی۔ وزارتِ صحت و سماجی بہبود کے ترجمان کے مطابق یہ اقدامات بچوں کو صحت مند اور خوشگوار زندگی فراہم کرنے کے لیے ناگزیر ہیں۔ ترجمان نے کہا کہ بچپن کا موٹاپا نہ صرف بچوں کو طویل المدتی بیماریوں میں مبتلا کرتا ہے بلکہ نیشنل ہیلتھ سروس (NHS) کو بھی اربوں پاؤنڈز کے اضافی اخراجات برداشت کرنا پڑتے ہیں۔
تازہ ترین خبروں کے لیے پی این آئی کا فیس بک پیج فالو کریں
