فلسطین کا اعلیٰ سطح وفد 4 روزہ دورے پر پاکستان پہنچ گیا۔
فلسطینی وفد کی قیادت قاضی القضاۃ ڈاکٹر محمود صدقی عبد الرحمان الہباش کر رہے ہیں جب کہ وفد میں امام مسجد اقصیٰ اور امام مسجد ابراہیمی بھی شامل ہیں۔
وفد کا استقبال چیئرمین پاکستان علماکونسل طاہر محمود اشرفی اور سیکرٹری مذہبی امور نے کیا۔ اس موقع پر پاکستان میں فلسطین کے سفیر ڈاکٹر زہیر اور اعلیٰ حکام بھی موجود تھے۔
فلسطینی وفد عالمی سیرت کانفرنس میں شرکت کرے گا۔ وفد وزیراعظم، صدر مملکت اور اعلیٰ حکام سے ملاقاتیں کرے گا۔
قاضی القضاۃ کا کہنا ہے کہ پاکستان ہمارا دوسرا گھر ہے پاکستانی قوم اور حکومت کے شکر گزار ہیں، پاکستان، سعودی عرب اور عالم اسلام کے موقف پر پوری فلسطینی قوم شکر گزار ہے وہ وقت قریب ہے جب ہم مسجد اقصیٰ میں اکٹھے ہو کر دو نفل شکرانے کے ادا کریں گے۔
انہوں نے کہا کہ ماہ ستمبر میں کئی ممالک فلسطین کو آزاد و خود مختار ریاست تسلیم کریں گے، اسرائیل ظلم و ستم کے باعث عالمی سطح پر تنہا ہوتا جا رہا ہے۔
طاہر محمود اشرفی کا کہنا تھا کہ پاکستان، پاکستانی قوم اور حکومت ہر لمحہ فلسطینی بھائیوں کے ساتھ ہے، اسرائیل کو ناجائز ریاست سمجھتے ہیں پاکستان آزاد و خود مختار فلسطینی ریاست کے قیام کیلئےفلسطینی عوام کیساتھ ہے، اہل فلسطین کی جدوجہد کو سلام پیش کرتے ہیں۔
تازہ ترین خبروں کے لیے پی این آئی کا فیس بک پیج فالو کریں
