بارش اور برفباری کی پیشگوئی، ایڈوائزری جاری

اسلام آباد: نیشنل ڈیزاسٹر منیجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر نے پیش گوئی کی ہے کہ 13 سے 18 دسمبر 2025 کے دوران ملک کے بالائی علاقوں میں بارش اور برف باری کا امکان ہے اور اس حوالے سے ایڈوائزری جاری کر دی گئی ہے۔

این ڈی ایم اے کی ایڈوائزری کے مطابق بالائی خیبر پختونخواہ، کوہستان، گلگت بلتستان، آزاد جموں و کشمیر اور بلوچستان کے مختلف پہاڑی علاقوں میں بارش اور برف باری متوقع ہے۔ 13 سے 15 دسمبر کے دوران مغربی ہواؤں کا سلسلہ شمالی و مغربی پاکستان میں اثر انداز ہوگا۔

ایڈوائزری میں کہا گیا ہے کہ ممکنہ موسمی حالات کے باعث دھند کی شدت میں اضافہ ہوسکتا ہے، میدانی علاقوں میں ہلکی سے درمیانی بارش جبکہ پہاڑی اور بالائی علاقوں میں شدید برف باری متوقع ہے۔ کوئٹہ، زیارت اور شمال مغربی بلوچستان کے کچھ علاقوں میں ہلکی بارش اور پہاڑی علاقوں میں برف باری کی توقع ہے۔

این ڈی ایم اے نے کہا کہ برف باری کے باعث پہاڑی راستوں پر ٹریفک متاثر اور بعض مقامات پر سڑکیں بند ہونے کا خدشہ ہے۔ 16 سے 18 دسمبر کے دوران برف باری کی شدت میں کمی ممکن ہے تاہم سردی برقرار رہے گی اور سڑکوں پر پھسلن کا خطرہ موجود رہے گا۔

نیشنل ایمرجنسی آپریشن سینٹر نے سیاحوں اور مسافروں سے اپیل کی ہے کہ پہاڑی علاقوں کے غیر ضروری سفر سے گریز کریں اور مقامی انتظامیہ کی ہدایات پر عمل کریں، جبکہ این ڈی ایم اے ممکنہ خطرات کے حوالے سے متعلقہ اداروں کو پیشگی آگاہی فراہم کر رہا ہے۔