ملک بھر میں موسلا دھار بارشوں کا الرٹ، سیلابی خطرہ بڑھ گیا

ملک بھر میں مون سون کا دسواں اسپیل آج سے داخل ہوگا، پیر سے بدھ تک کراچی میں بھی موسلا دھار بارشوں کی پیش گوئی کی گئی ہے۔ حکام نے اربن فلڈنگ کے خدشات ظاہر کر دیے ہیں۔

نیشنل ڈیزاسٹر منیجمنٹ اتھارٹی (این ڈی ایم اے) کے مطابق سندھ میں شدید بارشوں کے باعث میرپورخاص، شہید بینظیر آباد، تھرپارکر، خیرپور، سکھر، لاڑکانہ، ٹھٹہ، بدین، سجاول اور حیدرآباد کے نشیبی علاقے ممکنہ طور پر سیلاب کی زد میں آ سکتے ہیں۔ اسلام آباد اور پنجاب کے مختلف اضلاع میں بھی 7 سے 9 ستمبر تک بارشوں کا سلسلہ جاری رہنے کا امکان ہے، جس سے مری، راولپنڈی، لاہور، گوجرانوالہ، سیالکوٹ اور دیگر شہروں میں ندی نالوں میں طغیانی کا خطرہ بڑھ سکتا ہے۔

این ڈی ایم اے نے خبردار کیا ہے کہ پنجاب کے پہلے سے متاثرہ علاقے مزید سیلابی صورتحال کا سامنا کر سکتے ہیں۔ شہریوں کو ہدایت دی گئی ہے کہ ندی نالوں کے قریب آبادیاں انخلاء کے لیے راستے پہلے سے طے کریں، ہنگامی کٹ تیار رکھیں، زیر آب سڑکوں اور پلوں کو عبور کرنے سے گریز کریں اور مقامی انتظامیہ کی ہدایات پر عمل کریں۔ مزید برآں، سیلابی پانی کے باعث ممکنہ وبائی امراض سے بچاؤ کے لیے احتیاطی تدابیر اختیار کرنے کی بھی تاکید کی گئی ہے۔