اردن کے رائل انسٹیٹیوٹ آف اسٹریٹجک اسٹڈیز نے 500 بااثر مسلمانوں کی سالانہ فہرست جاری کر دی ہے، جس میں قطر کے امیر شیخ تمیم بن حمد آل ثانی کو مسلم دنیا کی سب سے بااثر شخصیت قرار دیا گیا ہے، جبکہ پاکستان کے ممتاز عالم دین مفتی تقی عثمانی دوسرے نمبر پر ہیں۔
فہرست میں وزیرِ اعظم شہباز شریف، آرمی چیف فیلڈ مارشل عاصم منیر اور معروف مبلغ مولانا طارق جمیل سمیت کئی پاکستانی شخصیات شامل ہیں۔ مولانا طارق جمیل 32ویں، مولانا نذرالرحمان 41ویں، اور شیخ محمد الیاس عطار قادری 44ویں نمبر پر ہیں۔
دیگر عالمی رہنماؤں میں ترک صدر رجب طیب اردوان، سعودی ولی عہد محمد بن سلمان، اماراتی صدر شیخ محمد بن زاید اور ایران کے سپریم لیڈر آیت اللہ خامنہ ای شامل ہیں۔
فہرست کے باقی 450 بااثر افراد میں پاکستان سے ڈاکٹر فرحت ہاشمی، ڈاکٹر طاہرالقادری، عمران خان، حافظ نعیم الرحمن، سید ساجد علی نقوی، پروفیسر عطاالرحمان اور اے آر وائی نیٹ ورک کے سی ای او سلمان اقبال کے نام بھی شامل ہیں۔
رپورٹ کے مطابق “The Muslim 500” پہلی بار 2009 میں شائع ہوئی تھی اور اب یہ دنیا بھر میں ایک معتبر حوالہ بن چکی ہے، جس میں ان مسلم رہنماؤں اور مفکرین کو تسلیم کیا جاتا ہے جو اپنی قیادت، علم اور جدت کے ذریعے جدید مسلم دنیا کو تشکیل دے رہے ہیں۔
تازہ ترین خبروں کے لیے پی این آئی کا فیس بک پیج فالو کریں
