راولپنڈی: انسدادِ دہشتگردی عدالت نے 26 نومبر احتجاج کیس میں علیمہ خان کی مسلسل غیرحاضری پر ساتویں مرتبہ ناقابلِ ضمانت وارنٹ گرفتاری جاری کر دیے۔
سماعت کے دوران عدالت کو بتایا گیا کہ علیمہ خان اور ان کے وکلا ایک بار پھر پیش نہیں ہوئے۔ عدالت میں علیمہ خان کے بینک اکاؤنٹس سے متعلق رپورٹ بھی جمع کرائی گئی، جس میں بتایا گیا کہ ان کے نام پر نمل یونیورسٹی سمیت فلاحی اداروں کے اکاؤنٹس موجود ہیں۔ عدالت نے اُن بینکوں کو نوٹس جاری کیے جنہوں نے رپورٹ جمع نہیں کرائی اور ہدایت کی کہ مکمل تفصیلات پیش کی جائیں۔
بعد ازاں عدالت نے علیمہ خان کے ساتویں ناقابلِ ضمانت وارنٹ گرفتاری برقرار رکھتے ہوئے مقدمے کی سماعت 6 نومبر تک ملتوی کردی۔ یاد رہے کہ علیمہ خان سمیت 11 ملزمان کے خلاف یہ مقدمہ تھانہ صادق آباد میں درج ہے۔
تازہ ترین خبروں کے لیے پی این آئی کا فیس بک پیج فالو کریں
