گلوبل صمود فلوٹیلا میں شامل برازیل کے تھیاگو ایویلا نے اسرائیلی دھمکیوں پر بھرپور ردعمل دیا ہے۔
فلوٹیلا کے آفیشل سوشل میڈیا پیج پر جاری ویڈیو میں دیکھا جا سکتا ہے کہ غزہ کی سمندری حدود میں داخلے سے قبل اسرائیلی نیوی نے ریڈیو کے ذریعے قافلے کو راستہ بدلنے اور رکنے کی دھمکیاں دیں۔ اسرائیل نے قافلے کے جہازوں اور کشتیوں کو غیر قانونی طور پر روکنے اور ضبط کرنے کی بھی دھمکیاں دیں۔
تھیاگو ایویلا نے واضح کیا کہ ہمارا سفر انسانی ہمدردی اور امن پر مبنی ہے، جو بین الاقوامی قوانین کے تحت بالکل جائز ہے۔ انہوں نے کہا:
“ہمارا مقصد اسرائیل کے غزہ پر برسوں پرانے غیر قانونی محاصرے کو ختم کرنا ہے۔ ہم وہاں کے معصوم لوگوں کے لیے کھانا، امداد، بچوں کا خشک دودھ، پانی کے فلٹر، بیساکھیاں اور دیگر ضروری سامان لے جا رہے ہیں، جنہیں آپ بھوک سے مار رہے ہیں۔”
ان کا مزید کہنا تھا کہ دنیا سب کچھ دیکھ رہی ہے اور ان اقدامات کے ذمہ داروں کو جوابدہ ہونا پڑے گا۔ “بین الاقوامی قوانین کے مطابق آپ کو ہمیں روکنے کی اجازت نہیں ہے، ہم آپ کی درخواست قبول نہیں کرسکتے۔”
خیال رہے کہ گلوبل صمود فلوٹیلا 40 سے زائد کشتیوں اور 500 سے زیادہ افراد پر مشتمل ہے۔ اسرائیلی افواج نے اس قافلے کو گھیرے میں لے لیا ہے اور اب تک 37 ممالک سے تعلق رکھنے والے 200 کارکنوں کو گرفتار کیا جا چکا ہے۔ گرفتار ہونے والوں میں سویڈن کی ماحولیاتی کارکن گریٹا تھنبرگ اور پاکستان کے سابق سینیٹر مشتاق احمد بھی شامل ہیں۔
تازہ ترین خبروں کے لیے پی این آئی کا فیس بک پیج فالو کریں
