ایشیا کپ رائزنگ اسٹارز، اسکواڈ کا اعلان کر دیا گیا

پاکستان کرکٹ بورڈ نے ایشیا کپ رائزنگ اسٹارز چیمپئن شپ 2025 (جسے پہلے ایمرجنگ ایشیا کپ کہا جاتا تھا) کے لیے 15 رکنی اسکواڈ کا اعلان کر دیا ہے۔

یہ ایونٹ 14 سے 23 نومبر تک قطر کے دارالحکومت دوحہ میں منعقد ہوگا اور ٹی ٹوئنٹی فارمیٹ میں کھیلا جائے گا۔ مجموعی طور پر 15 میچز شیڈول ہیں۔ ٹورنامنٹ میں دو گروپ بنائے گئے ہیں — گروپ اے میں سری لنکا، بنگلادیش، افغانستان اور ہانگ کانگ شامل ہیں، جبکہ گروپ بی میں پاکستان، بھارت، متحدہ عرب امارات اور عمان کی ٹیمیں مدِ مقابل ہوں گی۔ پاکستان شاہینز کی قیادت محمد عرفان خان کریں گے۔

ٹیم میں شامل دیگر کھلاڑیوں میں احمد دانیال، عرفات منہاس، معاز صداقت، محمد فائق، محمد غازی غوری، محمد نعیم، محمد سلمان، محمد شہزاد، مبصر خان، سعد مسعود، شاہد عزیز، صفیان مقیم، عبید شاہ اور یاسر خان شامل ہیں۔ پاکستان اپنا پہلا میچ 14 نومبر کو عمان کے خلاف، دوسرا 16 نومبر کو بھارت اے سے اور تیسرا 18 نومبر کو متحدہ عرب امارات کے خلاف کھیلے گا۔ ایونٹ کے سیمی فائنلز 21 نومبر کو جبکہ فائنل 23 نومبر کو کھیلا جائے گا۔ یہ چیمپئن شپ ٹیسٹ کھیلنے والے ممالک کی اے ٹیموں اور ایسوسی ایٹ ممالک کی مکمل قومی ٹیموں کے درمیان کھیلی جائے گی۔