متحدہ عرب امارات (یو اے ای) کے کپتان محمد وسیم نے بھارتی بیٹر روہت شرما کا بطور کپتان ٹی ٹوئنٹی میں سب سے زیادہ چھکے لگانے کا ریکارڈ توڑ دیا ہے۔
شارجہ کرکٹ اسٹیڈیم میں افغانستان کے خلاف سہ ملکی سیریز کے میچ کے دوران محمد وسیم نے یہ کارنامہ سرانجام دیا۔ انہوں نے 54 ٹی ٹوئنٹی اننگز میں 110 چھکے لگا کر روہت شرما کو پیچھے چھوڑ دیا۔ اس سے قبل روہت شرما نے 62 اننگز میں 105 چھکے مارے تھے۔ بطور کھلاڑی مجموعی طور پر ٹی ٹوئنٹی انٹرنیشنل میں سب سے زیادہ چھکے لگانے کا ریکارڈ اب بھی روہت شرما کے پاس ہے، جنہوں نے 159 میچز میں 205 چھکے مارے ہیں۔ محمد وسیم اس فہرست میں دوسرے نمبر پر ہیں اور اب تک 80 میچز میں 176 چھکے لگا چکے ہیں۔
گزشتہ روز کھیلے گئے میچ میں محمد وسیم نے شاندار بیٹنگ کرتے ہوئے صرف 37 گیندوں پر 67 رنز اسکور کیے، جس میں 6 چھکے اور 4 چوکے شامل تھے۔ تاہم ان کی جارحانہ اننگز کے باوجود یو اے ای کی ٹیم 189 رنز کے ہدف کا تعاقب نہ کر سکی اور مقررہ 20 اوورز میں 150 رنز بنا سکی۔
تازہ ترین خبروں کے لیے پی این آئی کا فیس بک پیج فالو کریں
