اولمپک گولڈ میڈلسٹ ارشد ندیم کے کوچ سلمان اقبال بٹ پر تاحیات پابندی عائد کر دی گئی ہے۔ ان پر ایتھلیٹکس فیڈریشن آف پاکستان کے آئین کی خلاف ورزی کا الزام ہے، جس پر ان کے خلاف یہ کارروائی کی گئی۔ ذرائع کے مطابق اب سلمان بٹ ایتھلیٹکس سے متعلق کسی بھی سرگرمی میں حصہ نہیں لے سکیں گے۔ یہ فیصلہ ورلڈ ایتھلیٹکس، ایشین ایتھلیٹکس اور پاکستان اسپورٹس بورڈ کو بھی آگاہ کر دیا گیا ہے۔ اسی کیس میں سید حبیب شاہ پر بھی دس سال کی پابندی عائد کی گئی ہے۔
دونوں افراد پر یہ پابندی بدانتظامی اور فیڈریشن کے آئین کی خلاف ورزی کے باعث لگائی گئی۔ سلمان بٹ اور حبیب شاہ نے پنجاب ایتھلیٹکس ایسوسی ایشن کے غیر قانونی اور غیر آئینی انتخابات منعقد کروائے تھے، جس کے بعد فیڈریشن نے 31 اگست کو ان انتخابات کو کالعدم قرار دے دیا۔ یہ انتخابات 29 اگست کو کروائے گئے تھے، جن کا طریقہ کار فیڈریشن کے آئین کے برخلاف تھا۔
ایتھلیٹکس فیڈریشن نے 30 اگست کو ایک خط کے ذریعے پنجاب ایسوسی ایشن کو ہدایت کی تھی کہ انتخابات کے لیے قانونی طریقہ اپنایا جائے۔ سلمان بٹ خود ان افراد میں شامل ہیں جنہوں نے فیڈریشن کے آئین پر دستخط کیے تھے۔ معاملے کی چھان بین کے لیے فیڈریشن نے انکوائری کمیٹی قائم کی، جس نے سلمان بٹ اور حبیب شاہ کو صفائی کا موقع دیا، لیکن دونوں کمیٹی کے سامنے پیش نہ ہوئے۔ بعد ازاں کمیٹی نے دستیاب ریکارڈ کی بنیاد پر اپنی رپورٹ پیش کی، جس کی روشنی میں پابندیاں عائد کی گئیں۔
تازہ ترین خبروں کے لیے پی این آئی کا فیس بک پیج فالو کریں
