ٹک ٹاکر سامعہ حجاب کو دھمکیاں دینے والا شخص گرفتار

اسلام آباد پولیس نے ٹک ٹاکر سامعہ حجاب کو ہراساں کرنے، قتل اور اغوا کی دھمکیاں دینے کے الزام میں حسن زاہد نامی شخص کو گرفتار کر لیا۔

پولیس ترجمان کے مطابق کارروائی سامعہ حجاب کی شکایت اور ویڈیو بیان موصول ہونے کے بعد کی گئی، جس پر تھانہ شالیمار میں مقدمہ درج کیا گیا۔ مقدمے میں پاکستان پینل کوڈ کی دفعات 354 (خواتین کی عزت مجروح کرنے کی نیت سے حملہ یا زبردستی)، 365 (اغوا)، 392 (ڈکیتی)، 500 (ہتکِ عزت)، 509 (خواتین کو ہراساں کرنا) اور 511 (ناکام مجرمانہ کوشش) شامل ہیں۔

تفصیلات کے مطابق ملزم کئی روز سے سامعہ حجاب کا پیچھا کرتا رہا اور بار بار تحائف دے کر دباؤ ڈالنے کی کوشش کرتا رہا۔ سامعہ نے بتایا کہ ملزم نے شادی کی پیشکش کی تھی، انکار پر وہ ہراساں کرتا رہا اور گھر تک پہنچ گیا۔ حسن زاہد نے دھمکی دی کہ شادی سے انکار کی صورت میں وہ اسے قتل کر دے گا۔ سامعہ نے اپنی ویڈیو میں کہا کہ ملزم نے گھر کی گھنٹی بجائی اور زبردستی ساتھ چلنے کو کہا۔ اس دوران وہ اس کا موبائل فون چھین کر گاڑی میں بیٹھ گیا۔ فون واپس لینے کی کوشش پر ملزم نے اسے ہراساں کیا اور اغوا کرنے کی کوشش کی۔

پولیس کا کہنا ہے کہ مقدمے کی مزید تفتیش جاری ہے اور ملزم کے خلاف ٹھوس شواہد اکٹھے کیے جا رہے ہیں۔