راولپنڈی: آٹے کی بڑھتی ہوئی قیمتوں کے خلاف نان بائی ایسوسی ایشن نے 28 اکتوبر کو شٹر ڈاؤن ہڑتال کا اعلان کر دیا۔
تفصیلات کے مطابق شہر میں آٹے کی قیمتوں میں ایک بار پھر نمایاں اضافہ دیکھنے میں آیا ہے۔ فائن آٹے کی 80 کلوگرام بوری 11 ہزار 700 روپے سے تجاوز کر گئی جبکہ لال آٹے کی بوری 10 ہزار 500 روپے سے اوپر پہنچ گئی۔
قیمتوں میں اضافے کے باعث نان کی قیمت 30 روپے سے بڑھا کر 35 روپے اور روغنی نان 50 روپے سے بڑھا کر 60 روپے کر دیا گیا ہے۔
نان بائی ایسوسی ایشن کا کہنا ہے کہ انہیں مہنگا آٹا خرید کر سستی روٹی فروخت کرنے پر مجبور کیا جا رہا ہے جبکہ آٹا مافیا کے خلاف کوئی عملی اقدام نہیں کیا جا رہا۔
ایسوسی ایشن کے نمائندوں کے مطابق ضلعی انتظامیہ کی جانب سے بھاری جرمانوں اور گرفتاریوں کا سلسلہ بھی جاری ہے، جس پر نان بائی برادری میں شدید بے چینی پائی جاتی ہے۔
تازہ ترین خبروں کے لیے پی این آئی کا فیس بک پیج فالو کریں
