عوام ایکسپریس حادثہ کس وجہ سے ہوا؟ رپورٹ میں اہم انکشاف

عوام ایکسپریس حادثے سے متعلق ابتدائی جوائنٹ سرٹیفکیٹ رپورٹ سامنے آ گئی ہے جس میں حادثے کے ذمہ دار کا بھی تعین کیا گیا ہے۔

تفصیلات کے مطابق عوام ایکسپریس ٹرین کو لودھراں کے قریب حادثہ پیش آیا ہے، جس کی ابتدائی رپورٹ میں بتایا گیا ہے کہ یہ حادثہ ٹرین کے اوور شوٹ ہونے کی وجہ سے ہوا ہے۔

ابتدائی رپورٹ کے مطابق عوام ایکسپریس حادثہ ٹرین ڈرائیور کی غلطی قرار دے دیا گیا ہے، ٹرین ڈرائیور وقت پر بریک نہ لگا سکا تھا، جس کی وجہ سے اتنا بڑا حادثہ پیش آیا، اس حادثے میں ایک مسافر جاں بحق اور متعدد زخمی ہوئے ہیں۔

واضح رہے کہ گزشتہ روز پشاور سے کراچی جانے والی عوامی ایکسپریس ٹرین کے ساتھ لودھراں جنکشن کے قریب حادثہ پیش آیا تھا، مسافروں کے مطابق ریل لودھراں جنکشن کے مقام پر نہیں رکی اور آگے مال بردار گاڑی کے کھڑے انجن کے ساتھ ٹکرا گئی، جس کی وجہ سے ٹرین کی متعدد بوگیاں ٹریک سے اتر گئیں۔

ریلوے حکام کے مطابق ڈاؤن ٹریک کو بحال کر دیا گیا ہے، 6 نمبر ٹریک پر کام جاری ہے، عوام ایکسپریس کے 250 مسافروں کو رحمان بابا ایکسریس سے کراچی روانہ کر دیا گیا ہے۔ وزیر ریلوے نے حادثے کا نوٹس لیتے ہوئے انکوائری کا حکم دے دیا ہے۔ 7 دنوں میں رپورٹ پیش کرنے کی ہدایت کی گئی ہے۔