ایزی پیسہ کی جانب سے صارفین کیلئے حیران کن آفر کر دی گئی

ایزی پیسہ صارفین اب 100 سے زیادہ کرنسیوں میں سرحد پار ادائیگیاں کر سکیں گے اور 100 سے زائد ممالک سے ترسیلاتِ زر براہِ راست اپنے ایزی پیسہ اکاؤنٹس میں وصول کر سکیں گے۔ ایزی پیسہ ڈیجیٹل بینک نے اپنے ڈیجیٹل بینکنگ آپریشنز کی پہلی سالگرہ کے موقع پر ایک مقامی ہوٹل میں اسٹیک ہولڈرز کے اعزاز میں عشائیے کا اہتمام کیا جس میں وفاقی وزرا، پالیسی سازوں، ریگولیٹرز، کاروباری رہنماؤں اور میڈیا نمائندگان نے شرکت کی۔ یہ تقریب بورڈ چیئرمین عرفان وہاب خان، اینٹ انٹرنیشنل کے صدر ڈگلس فیگن اور ایزی پیسہ ڈیجیٹل بینک کے صدر و سی ای او جہانزیب خان کی میزبانی میں منعقد ہوئی۔

اس موقع پر ایزی پیسہ نے پہلی بار آڈیو نکاح نامہ کا فیچر بھی متعارف کرایا۔ تقریب کی مہمانِ خصوصی وفاقی وزیر برائے انفارمیشن ٹیکنالوجی و ٹیلی کمیونیکیشن شزہ فاطمہ خواجہ نے ایزی پیسہ کو ایک سال مکمل کرنے پر مبارکباد دیتے ہوئے کہا کہ وزیراعظم کی ہدایات کے مطابق ڈیجیٹل معیشت کا فروغ حکومت کی اولین ترجیح ہے اور اس کے لیے ٹھوس اقدامات کیے جا رہے ہیں۔ وزیرِ مملکت برائے خزانہ بلال اظہر کیانی نے خطاب کرتے ہوئے کہا کہ مؤثر پالیسی سازی کے لیے ڈیجیٹل فنانس کے ماہرین کی شمولیت ناگزیر ہے اور کیش لیس معیشت کے فوائد عوام تک پہنچانا وقت کی ضرورت ہے۔

ایزی پیسہ ڈیجیٹل بینک کی جانب سے بتایا گیا کہ سال 2025 کے دوران اس پلیٹ فارم کے ذریعے 3.8 ارب سے زائد ٹرانزیکشنز ہوئیں جن کی مجموعی مالیت 15 کھرب روپے سے تجاوز کر گئی ہے۔ مزید برآں، ایزی پیسہ ڈیجیٹل بینک کے 9 ماہ کے منافع میں 45 فیصد اضافہ بھی ریکارڈ کیا گیا ہے۔