اسلام آباد: نیشنل ڈیٹا بیس اینڈ رجسٹریشن اتھارٹی (نادرا) نے بعض سیاسی عناصر کی جانب سے لسانی بنیادوں پر امتیاز سے متعلق پھیلائے جانے والے گمراہ کن پروپیگنڈے کو مسترد کر دیا ہے۔
نادرا کی جانب سے جاری وضاحتی بیان میں کہا گیا ہے کہ امتیازی نوٹس سے متعلق سوشل میڈیا پر گردش کرنے والی ٹویٹ جعلی خبر ہے اور نادرا اسے یکسر مسترد کرتا ہے۔ بیان میں واضح کیا گیا کہ پاکستان بھر میں نادرا کے کسی بھی دفتر میں اس نوعیت کا کوئی نوٹس آویزاں نہیں کیا گیا۔
نادرا نے اپنے قومی مینڈیٹ کے تحت تمام شہریوں کو بلا امتیاز خدمات فراہم کرنے کے عزم کا اعادہ کرتے ہوئے کہا کہ ادارہ نسل، زبان یا کسی بھی بنیاد پر تفریق کے بغیر عوام کو سہولیات فراہم کر رہا ہے۔
وضاحتی بیان میں کہا گیا کہ مذکورہ ٹویٹ کے ذریعے جان بوجھ کر حقائق کو مسخ کرنے کی کوشش کی گئی ہے اور پاکستان میں بدامنی اور انتشار پھیلانے کے لیے مخصوص سیاسی عناصر من گھڑت خبریں پھیلا رہے ہیں۔
نادرا کا کہنا ہے کہ ملک دشمن عناصر جھوٹ اور فریب کے ذریعے پاکستان میں انتشار پیدا کرنے کی کوشش کر رہے ہیں۔
واضح رہے کہ سوشل میڈیا پر ایک مبینہ نوٹس گردش کر رہا ہے جس میں یہ دعویٰ کیا گیا ہے کہ نادرا کے دفاتر میں پختون قومیت رکھنے والے شہریوں کے لیے نئی ہدایات جاری کی گئی ہیں۔
تازہ ترین خبروں کے لیے پی این آئی کا فیس بک پیج فالو کریں
