عالمی بینک نے پاکستان کو 40 کروڑ ڈالر فراہم کرنے کا اعلان کر دیا ہے۔ اس رقم سے 45 لاکھ افراد کو صاف پانی، نکاسی آب اور ویسٹ مینجمنٹ کی بہتر سہولیات فراہم کی جائیں گی۔
عالمی بینک نے پنجاب انکلوسیو سٹیز پروگرام کے لیے 40 کروڑ ڈالر کی فنڈنگ کی منظوری دی ہے۔ عالمی بینک کے اعلامیے میں بتایا گیا کہ اس فنڈ سے پنجاب کے 16 شہروں میں شہری سہولیات کو بہتر بنانے کا ایک بڑا منصوبہ شروع کیا جائے گا۔
اعلامیے کے مطابق پروگرام کے ذریعے 45 لاکھ سے زائد افراد کو صاف پانی، نکاسی آب اور ویسٹ مینجمنٹ کی بہتر سہولیات جبکہ 20 لاکھ سے زیادہ شہریوں کو معیاری صفائی کا نظام دستیاب ہوگا۔ ورلڈ بینک نے کہا کہ یہ منصوبہ بچوں میں اسٹنٹنگ کی شرح کم کرنے اور پانی سے پھیلنے والی بیماریوں کے خاتمے میں بھی معاون ثابت ہوگا۔
اس پروگرام کے تحت بلدیاتی اداروں کو مزید خودمختار اور مضبوط بنانے پر زور دیا جائے گا تاکہ شہروں کا انتظام زیادہ مؤثر طریقے سے چلایا جا سکے۔ اعلامیے میں مزید کہا گیا کہ منصوبے سے پنجاب کے شہر مستقبل میں سیلاب، خشک سالی اور ماحولیاتی خطرات سے بہتر طور پر نمٹ سکیں گے، جبکہ شہری سہولیات کی مجموعی بہتری سے لوگوں کے معیارِ زندگی میں نمایاں بہتری آئے گی۔
تازہ ترین خبروں کے لیے پی این آئی کا فیس بک پیج فالو کریں
