وزیر اعظم شہباز شریف نے اسلام آباد کے جی الیون سیکٹر میں کچہری کے باہر ہونے والے خودکش دھماکے کی شدید الفاظ میں مذمت کرتے ہوئے واقعے کی فوری تحقیقات کا حکم دیا ہے۔ انہوں نے اس حملے کو “بھارتی اسپانسرڈ فتنہ الخوارج کا دہشتگرد حملہ” قرار دیتے ہوئے شہید افراد کے درجات کی بلندی اور ان کے اہل خانہ کے لیے صبر کی دعا کی۔
وزیر اعظم نے زور دے کر کہا کہ “بھارتی دہشتگرد پراکسیز کے پاکستان کے نہتے شہریوں پر حملے قابل مذمت ہیں۔ ہم ذمہ داران کو کیفر کردار تک پہنچا کر ہی دم لیں گے۔” انہوں نے افغان سرزمین سے ہونے والے حملوں کی نشاندہی کرتے ہوئے کہا کہ “فتنہ الخوارج نے وانا میں معصوم بچوں پر بھی حملہ کیا ہے۔ بھارتی پشت پناہی اور افغان سرزمین سے جاری حملوں کی جتنی مذمت کی جائے کم ہے۔”
انہوں نے یقین دلایا کہ “نہتے و معصوم پاکستانیوں کا خون رائیگاں نہیں جانے دیں گے” اور زخمیوں کو بہترین طبی سہولیات فراہم کرنے کی ہدایات جاری کیں۔ وزیر اعظم نے قوم کی طرف سے شہداء کے اہل خانہ کے ساتھ یکجہتی کا اظہار کرتے ہوئے زخمیوں کی جلد صحت یابی کی دعا کی۔
تازہ ترین خبروں کے لیے پی این آئی کا فیس بک پیج فالو کریں
