کمپریسر استعمال کرنیوالے صارفین کی شامت آگئی ، اہم فیصلہ

سوئی ناردرن گیس کمپنی نے کمپریسر استعمال کرنے والے صارفین کے خلاف سخت کارروائی کا فیصلہ کر لیا ہے۔ اس مقصد کے لیے خصوصی ٹیمیں تشکیل دی گئی ہیں جو گیس کنکشنز کی نگرانی کر کے کمپریسر کے استعمال کی نشاندہی کریں گی۔

ابتدائی مرحلے میں کمپریسر استعمال کرنے والے صارفین کے کنکشن 15 روز کے لیے منقطع کیے جائیں گے، جبکہ حلف نامہ جمع کروانے پر کنکشن بحال کیا جائے گا۔ ذرائع کے مطابق اگر کوئی صارف وارننگ کے باوجود دوبارہ کمپریسر استعمال کرتے پکڑا گیا تو اس کا میٹر تین ماہ کے لیے اتار دیا جائے گا۔

حکام کا کہنا ہے کہ موسم کی تبدیلی کے باعث گیس کے استعمال میں اضافہ ہوا ہے، اور بعض علاقوں میں پریشر کم ہونے پر لوگ کمپریسر استعمال کرتے ہیں، جس سے نہ صرف خطرات بڑھ جاتے ہیں بلکہ دیگر گھروں میں گیس کی فراہمی بھی متاثر ہوتی ہے۔

سوئی ناردرن نے شہریوں سے اپیل کی ہے کہ وہ کمپریسر کے استعمال سے گریز کریں اور اگر پریشر میں کمی کا سامنا ہو تو متعلقہ شکایت درج کروائیں تاکہ گیس کی محفوظ اور مؤثر فراہمی برقرار رکھی جا سکے۔