راولپنڈی میں آزاد کشمیر میں ان ہاؤس تبدیلی کے معاملے پر مسلم لیگ ن کے اہم اجلاس کی اندرونی تفصیلات سامنے آ گئی ہیں۔
ذرائع کے مطابق اجلاس میں وفاقی وزرا احسن اقبال، رانا ثناءاللہ اور وزیرِ امورِ کشمیر انجینئر امیر مقام نے شرکت کی۔ اجلاس میں مسلم لیگ ن آزاد کشمیر کے صدر شاہ غلام قادر، سابق وزیراعظم راجہ فاروق حیدر اور پارلیمانی پارٹی کے اراکین سمیت مرکزی عہدیداران بھی شریک ہوئے۔
ذرائع کا کہنا ہے کہ مسلم لیگ ن نے آزاد کشمیر میں حکومت کی تبدیلی کے حوالے سے مشاورت مکمل کر لی ہے اور فیصلہ کیا ہے کہ نئے وزیراعظم کے انتخاب میں پیپلز پارٹی کے امیدوار کو ووٹ نہیں دیا جائے گا۔
اطلاعات کے مطابق ن لیگ حکومت کی تبدیلی کی تحریک میں پیپلز پارٹی کا ساتھ دے گی لیکن نئی حکومت کا حصہ نہیں بنے گی۔ اجلاس میں واضح کیا گیا کہ تحریکِ عدم اعتماد اور قائد ایوان کے انتخاب کو الگ الگ معاملات کے طور پر دیکھا جائے گا۔
ذرائع کے مطابق اجلاس میں یہ بھی طے پایا کہ مسلم لیگ ن پیپلز پارٹی سے جلد انتخابات کے حوالے سے مزید مشاورت کرے گی، جبکہ سیاسی رابطہ کمیٹی نے آزاد کشمیر کی پارلیمانی قیادت کو پیپلز پارٹی کے ساتھ طے پانے والے فارمولے پر اعتماد میں لیا۔
ذرائع کے مطابق کمیٹی نے آزاد کشمیر کی قیادت سے آئندہ کی سیاسی حکمتِ عملی کے بارے میں تجاویز طلب کی ہیں، جن پر وزیراعظم شہباز شریف کو وطن واپسی پر تفصیلی بریفنگ دی جائے گی۔
تازہ ترین خبروں کے لیے پی این آئی کا فیس بک پیج فالو کریں
