بڑا کریک ڈاؤن، گاڑی مالکان کو خبر دار کر دیا گیا

لاہور: ماحولیاتی قوانین پر سختی سے عمل درآمد کے لیے پنجاب انوائرنمنٹل پروٹیکشن ایجنسی (ای پی اے) نے گاڑی مالکان کو 15 نومبر تک کی مہلت دے دی ہے۔ حکام نے واضح کر دیا ہے کہ آخری تاریخ کے بعد بغیر گرین اسٹیکر یا ایگزاسٹ ٹیسٹنگ سرٹیفکیٹ (ETS) والی گاڑیوں کو دیکھتے ہی ضبط کر لیا جائے گا۔

ڈائریکٹر جنرل ماحولیات ڈاکٹر شیخ کے مطابق لاہور سمیت صوبے بھر میں گاڑیوں کے دھوئیں اور شور کی جانچ اب لازمی قرار دے دی گئی ہے۔ انہوں نے کہا کہ ماحولیاتی معیار پر پورا نہ اترنے والی گاڑیوں کے خلاف زیرو ٹالرینس پالیسی کے تحت کارروائی کی جائے گی۔ ڈاکٹر شیخ نے شہریوں کو خبردار کرتے ہوئے کہا کہ 15 نومبر کے بعد کسی بھی گاڑی کو بغیر ETS سرٹیفکیٹ یا گرین اسٹیکر کے سڑک پر چلنے کی اجازت نہیں ہوگی۔ صرف وہی گاڑیاں رواں دواں رہیں گی جو ماحول دوست ہوں گی۔

ای پی اے پنجاب نے لاہور سے ملک گیر انسداد آلودگی مہم کا آغاز کر دیا ہے اور عوام سے اپیل کی ہے کہ وہ بروقت اپنی گاڑیوں کا ٹیسٹ کروائیں، بصورت دیگر گاڑیاں سڑکوں سے ہٹا دی جائیں گی۔ ماہرین کے مطابق یہ اقدام پنجاب میں فضائی آلودگی کے خلاف ایک تاریخی اور فیصلہ کن قدم ہے—جس کا پیغام بالکل واضح ہے:
“آلودگی پھیلانے والی کوئی گاڑی نہیں بچے گی!”