لاہور: پنجاب حکومت نے سرکاری ملازمین اور پنشنرز کے لیے خوشخبری سنا دی ہے۔ صوبائی حکومت نے اکتوبر کی تنخواہیں اور پنشن معمول سے پہلے ادا کرنے کا فیصلہ کر لیا ہے۔
پنجاب فنانس ڈیپارٹمنٹ کے جاری کردہ نوٹیفکیشن کے مطابق تنخواہیں اور پنشن جمعہ، 31 اکتوبر 2025 کو جاری کی جائیں گی۔ حکام کا کہنا ہے کہ چونکہ یکم اور 2 نومبر ہفتہ اور اتوار کی سرکاری تعطیلات ہیں، اس لیے بروقت ادائیگی یقینی بنانے کے لیے یہ پیشگی اقدام اٹھایا گیا ہے۔ سیکشن آفیسر (ایف آر) محمد یونس کے دستخط سے جاری مراسلے میں اکاؤنٹنٹ جنرل پنجاب اور تمام ضلعی اکاؤنٹس افسران کو ہدایت دی گئی ہے کہ ادائیگی کا عمل 31 اکتوبر تک مکمل کیا جائے۔
یہ سرکلر تمام انتظامی سیکریٹریز، کمشنرز، ڈپٹی کمشنرز، اور ماتحت محکموں کے سربراہان کو ارسال کیا گیا ہے، جبکہ رجسٹرار لاہور ہائی کورٹ، ضلعی و سیشن ججز، گورنر ہاؤس اور وزیراعلیٰ آفس کو بھی اس فیصلے سے آگاہ کر دیا گیا ہے۔
تازہ ترین خبروں کے لیے پی این آئی کا فیس بک پیج فالو کریں
