الیکشن کمیشن آف پاکستان نے پنجاب کے پانچ حلقوں میں ضمنی انتخابات کا نیا شیڈول جاری کر دیا ہے، جس کے مطابق پولنگ تیئیس نومبر دو ہزار پچیس کو ہو گی۔
فیصل آباد اور ساہیوال کے حلقہ این اے چھانوے، این اے ایک سو چار، این اے ایک سو تینتالیس، پی پی اٹھانوے اور پی پی دو سو تین میں ووٹنگ ہوگی۔ ریٹرننگ آفیسرز کے فیصلوں کے خلاف اپیلیں چوبیس اکتوبر تک دائر کی جا سکتی ہیں، جبکہ اپیلٹ ٹریبونل ان پر فیصلے اکتیس اکتوبر تک کرے گا۔
امیدواروں کی نظرِ ثانی شدہ فہرست یکم نومبر کو شائع کی جائے گی اور دستبرداری کی آخری تاریخ تین نومبر مقرر کی گئی ہے، جبکہ انتخابی نشانات چار نومبر کو الاٹ کیے جائیں گے۔
ترجمان الیکشن کمیشن کے مطابق شیڈول الیکشن ایکٹ دو ہزار سترہ کے تحت جاری کیا گیا ہے اور تمام امیدواروں اور سیاسی جماعتوں کو ضابطۂ اخلاق کی مکمل پابندی کی ہدایت کی گئی ہے۔
تازہ ترین خبروں کے لیے پی این آئی کا فیس بک پیج فالو کریں
