لاہور: پنجاب کابینہ نے تحریک لبیک پاکستان (ٹی ایل پی) پر پابندی عائد کرنے کی منظوری دے دی ہے۔
لاہور میں پریس کانفرنس کرتے ہوئے وزیر اطلاعات پنجاب عظمیٰ بخاری نے کہا کہ دنیا غزہ جنگ بندی میں پاکستان کے کردار کو سراہ رہی ہے، مگر ایک مذہبی جماعت نے ایسے وقت میں احتجاج کا اعلان کیا جب غزہ میں امن معاہدہ طے پا چکا تھا۔ عظمیٰ بخاری کے مطابق احتجاج کے دوران سرکاری املاک کو نقصان پہنچایا گیا اور پرتشدد کارروائیاں کی گئیں۔ انہوں نے کہا کہ پولیس کی گاڑیاں جلانے اور عوامی املاک تباہ کرنے سے غزہ کا مسئلہ حل نہیں ہوسکتا، ریاست ایسے احتجاج اور توڑ پھوڑ کو برداشت نہیں کرے گی۔
ان کا کہنا تھا کہ کسی کو بھی عوام کے بنیادی حقوق پامال کرنے کی اجازت نہیں دی جا سکتی۔ تاجر برادری، ٹرانسپورٹرز اور عوام کا شکریہ جنہوں نے ہڑتال کی کال کو مسترد کیا۔ وزیر اطلاعات نے مزید بتایا کہ پنجاب کابینہ نے ٹی ایل پی پر پابندی کی منظوری دے دی ہے، اور اس فیصلے کی سمری وفاقی حکومت کو بھجوا دی گئی ہے۔ واضح رہے کہ گزشتہ روز یہ اطلاعات سامنے آئی تھیں کہ پنجاب حکومت وفاق سے مذہبی جماعت پر پابندی عائد کرنے اور اس کے تمام اثاثے تحویل میں لینے کی سفارش کرے گی۔
تازہ ترین خبروں کے لیے پی این آئی کا فیس بک پیج فالو کریں
