مدینہ منورہ: عالم اسلام ایک عظیم علمی شخصیت سے محروم ہو گیا۔ مسجد نبوی ﷺ میں طویل عرصے تک قرآن پاک کی تعلیم دینے والے معروف پاکستانی نژاد عالمِ دین مولانا قاری بشیر احمد صدیق انتقال کر گئے۔
جامعہ اشرفیہ لاہور کے ترجمان کے مطابق مرحوم کی نمازِ جنازہ مسجد نبوی ﷺ میں ادا کی گئی۔
نماز جنازہ کی امامت شیخ صلاح البدیر (امام مسجد نبوی ﷺ) نے کی۔
بعد ازاں انہیں جنت البقیع کے مقدس قبرستان میں سپردِ خاک کیا گیا۔
مولانا بشیر احمد صدیق گزشتہ 60 برس سے مسجد نبوی ﷺ میں قرآن کریم کی تعلیم دے رہے تھے۔
دنیا بھر سے آئے زائرین اور طلبہ ان سے فیض حاصل کرتے رہے۔
وہ دارالعلوم کراچی کے فاضل تھے اور کئی دہائیوں تک امت مسلمہ کی دینی رہنمائی کا باعث بنے۔
دینی حلقوں کا ردعمل:
عالمی اور مقامی دینی حلقوں نے مولانا کے انتقال پر گہرے رنج و غم کا اظہار کرتے ہوئے کہا ہے کہ:
“ان کا انتقال امت مسلمہ کے لیے ایک ناقابلِ تلافی نقصان ہے۔ ان کی خدمات، علم و تقویٰ اور اخلاص ہمیشہ یاد رکھا جائے گا۔”
علمائے کرام، دینی اداروں اور طلبہ کی بڑی تعداد نے ان کی مغفرت اور بلندیٔ درجات کی دعا کرتے ہوئے اہل خانہ سے اظہارِ تعزیت کیا ہے۔
اللّٰہ تعالیٰ مولانا قاری بشیر احمد صدیق کی مغفرت فرمائے، ان کے درجات بلند کرے، اور ان کے علم و عمل کو صدقہ جاریہ بنائے۔ آمین۔
تازہ ترین خبروں کے لیے پی این آئی کا فیس بک پیج فالو کریں
