اسلام آباد: وزیر اعلیٰ پنجاب مریم نواز کے حالیہ بیان کے خلاف مسلم لیگ (ن) کی اتحادی جماعت پیپلز پارٹی نے قومی اسمبلی کے اجلاس سے واک آؤٹ کیا۔
اسپیکر قومی اسمبلی سردار ایاز صادق کی زیر صدارت اجلاس میں پیپلز پارٹی کے ارکان نے احتجاجاً ایوان سے واک آؤٹ کیا۔ رہنما پیپلز پارٹی نوید قمر نے کہا کہ “ہم نے پہلے بھی احتجاج کیا اور حکومتی ٹیم سے مذاکرات ہوئے، لیکن زمینی حقائق میں کوئی تبدیلی نہیں آئی۔ جب تک حالات بہتر نہیں ہوتے ہم ایوان کا حصہ نہیں بن سکتے۔” بعد ازاں حکومتی ارکان نے پیپلز پارٹی کو منا کر دوبارہ اجلاس میں شرکت پر آمادہ کر لیا۔
واضح رہے کہ گزشتہ روز لاہور میں تقریب سے خطاب کرتے ہوئے مریم نواز نے کہا تھا کہ اگر کوئی پنجاب کے خلاف بات کرے گا تو وہ بطور وزیر اعلیٰ خاموش نہیں بیٹھیں گی۔ ان کا کہنا تھا کہ “سیلاب کے دوران عالمی امداد مانگنے کا کہا گیا، مگر میں کبھی اپنے عوام کو کشکول پکڑنے پر مجبور نہیں کروں گی۔ عزت نفس پر سمجھوتہ نہیں ہوگا اور نہ ہی کسی سے معافی مانگوں گی۔”
دوسری جانب اسلام آباد میں صحافیوں پر پولیس تشدد کے خلاف پریس کلب میں بھی احتجاج کیا گیا اور صحافیوں نے پریس گیلری سے واک آؤٹ کیا۔ یاد رہے کہ گزشتہ روز نیشنل پریس کلب اسلام آباد میں پولیس نے دھاوا بول کر صحافیوں پر تشدد اور املاک کو نقصان پہنچایا، جس پر ملک بھر کی صحافتی تنظیموں نے شفاف تحقیقات کا مطالبہ کیا ہے۔
تازہ ترین خبروں کے لیے پی این آئی کا فیس بک پیج فالو کریں
