انسانی اسمگلرز نے زمینی راستوں پر سختی کے بعد نیا طریقہ واردات اپنا لیا۔ وفاقی تحقیقاتی ایجنسی (ایف آئی اے) کے مطابق 22 افراد پر مشتمل جعلی فٹبال ٹیم سیالکوٹ ایئرپورٹ سے جاپان پہنچ گئی۔
ایف آئی اے کے مطابق ان افراد کو فٹبال ٹیم کے کھلاڑیوں کے طور پر تربیت دی گئی تھی، تاکہ وہ اصل کھلاڑیوں کا تاثر دے سکیں۔ ملزم ملک وقاص نے ان تمام افراد سے فی کس 40 لاکھ روپے وصول کیے۔ جعلی دستاویزات کے ذریعے ٹیم کو جاپان میں شیڈول میچز دکھا کر ویزے حاصل کیے گئے۔ دستاویزات میں فٹبال فیڈریشن کی جعلی رجسٹریشن، وزارت خارجہ کے جعلی کاغذات اور فرضی میچ شیڈول شامل تھے۔
جاپان پہنچنے پر امیگریشن حکام نے دستاویزات کی جانچ کے بعد انہیں جعلی قرار دے دیا، جس کے بعد تمام 22 افراد کو ڈی پورٹ کر دیا گیا۔ ایف آئی اے نے اسکینڈل میں ملوث ملزم ملک وقاص کو گرفتار کر لیا ہے اور تھانہ ایف آئی اے گوجرانوالہ میں مقدمہ بھی درج کر لیا گیا ہے۔
گرفتار ملزم نے انکشاف کیا ہے کہ اس نے جنوری 2024 میں بھی ایک جعلی فٹبال ٹیم کے ذریعے 17 افراد کو جاپان بھجوایا تھا۔ ایف آئی اے کا کہنا ہے کہ معاملے کی مزید تفتیش جاری ہے اور دیگر ممکنہ ملزمان کی تلاش بھی کی جا رہی ہے۔
تازہ ترین خبروں کے لیے پی این آئی کا فیس بک پیج فالو کریں
