پی ٹی آئی کے سینئر رہنما کی پارٹی قیادت پر تنقید

پی ٹی آئی کے سینئر رہنما قاضی انور نے پارٹی قیادت پر کڑی تنقید کرتے ہوئے کہا کہ وزیر اعلیٰ علی امین گنڈاپور کو فوجی شہداء کے جنازوں میں شرکت کرنی چاہیے۔

راولپنڈی میں میڈیا سے گفتگو کرتے ہوئے انہوں نے کہا کہ اگر مجھے علم ہوتا تو میں خود جنازوں میں شریک ہوتا۔ “جب میں قیادت سے مطمئن نہیں تو عوام کیسے ہوں گی؟” انہوں نے شکوہ کیا۔ قاضی انور نے بتایا کہ گزشتہ 6 ماہ سے بانی پی ٹی آئی سے ملاقات نہیں ہو سکی، “میں 3 بجے تک انتظار کرتا ہوں اور پھر واپس چلا جاتا ہوں۔”

انہوں نے کہا کہ علی امین گنڈاپور کو سوشل میڈیا پر غدار کہا جاتا ہے، “اگر وہ غدار ہیں تو اس حکومت کی اہمیت کیا ہے؟ پتہ نہیں کون یہ پروپیگنڈا کرتا ہے۔” ان کا مزید کہنا تھا کہ بیرسٹر گوہر اور سلمان اکرم راجہ اچھے وکیل ہیں لیکن سیاسی فہم میں کمزور ہیں۔ “عوام کی سپورٹ کے بغیر نہ جدوجہد ممکن ہے نہ انقلاب، ایماندار قیادت ہی عوام کو باہر نکالتی ہے۔”

انہوں نے خبردار کیا کہ شمالی اور جنوبی وزیرستان کی صورتحال سنبھالنا اب مشکل ہو رہا ہے، “دہشت گرد فوج کے راستے میں بارود ڈالتے ہیں۔”