آئی ایس پی آر کے مطابق بلوچستان کے ضلع مستونگ میں سیکیورٹی فورسز نے انٹیلی جنس معلومات کی بنیاد پر کامیاب آپریشن کیا، جس میں فتنہ الہندوستان سے تعلق رکھنے والے 4 بھارتی حمایت یافتہ دہشتگرد مارے گئے۔
کارروائی کے دوران دہشتگردوں کے ٹھکانے پر شدید فائرنگ کا تبادلہ ہوا، جس کے بعد سیکیورٹی فورسز نے ان کا اسلحہ، گولہ بارود اور دھماکہ خیز مواد بھی برآمد کر لیا۔ ہلاک دہشتگرد علاقے میں متعدد دہشتگرد کارروائیوں میں ملوث تھے۔ علاقے میں مزید دہشتگردوں کی تلاش کے لیے کلیئرنس آپریشن جاری ہے۔
وزیراعظم کا خراج تحسین
وزیراعظم شہباز شریف نے کامیاب آپریشن پر سیکیورٹی فورسز کو خراج تحسین پیش کیا اور کہا کہ قوم دہشتگردی کے خلاف جنگ میں اپنی سیکیورٹی فورسز کے ساتھ کھڑی ہے۔ انہوں نے عزم ظاہر کیا کہ ملک سے ہر قسم کی دہشتگردی کا مکمل خاتمہ کیا جائے گا۔
وزیر داخلہ کا بیان
وفاقی وزیر داخلہ محسن نقوی نے بھی اس کامیاب آپریشن پر سیکیورٹی فورسز کی تعریف کی۔ ان کا کہنا تھا کہ فورسز نے بھارتی اسپانسرڈ دہشتگردوں کے مذموم عزائم کو ناکام بنایا، قوم کو بہادر سیکیورٹی فورسز پر فخر ہے۔
تازہ ترین خبروں کے لیے پی این آئی کا فیس بک پیج فالو کریں
