بھارت کی جانب سے دریائے ستلج میں مزید پانی چھوڑنے کے بعد پاکستان میں وزارتِ آبی وسائل نے سیلاب الرٹ جاری کردیا۔ بھارتی ہائی کمیشن نے پاکستانی حکام کو پانی چھوڑنے کی اطلاع دی جس پر پی ڈی ایم اے پنجاب نے شہریوں کی جان و مال کے تحفظ کے لیے فوری اقدامات کی ہدایت کی ہے۔
پی ڈی ایم اے کے مطابق دریائے ستلج میں ہریکے ڈاؤن اسٹریم اور فیروزپور ڈاؤن اسٹریم پر اس وقت اونچے درجے کا سیلاب موجود ہے اور پانی کا بہاؤ مسلسل بڑھ رہا ہے۔ گنڈا سنگھ والا پر پانی کا بہاؤ 2 لاکھ 30 ہزار کیوسک، جبکہ سلیمانکی میں ایک لاکھ 37 ہزار کیوسک ریکارڈ کیا گیا ہے۔ دوسری جانب دریائے چناب کے مختلف مقامات پر بھی پانی کی سطح بلند ہے۔ مرالہ پر بہاؤ 62 ہزار، خانکی اور قادرآباد پر 98 ہزار، ہیڈ تریموں پر 2 لاکھ 50 ہزار کیوسک، جبکہ پنجند کے مقام پر انتہائی اونچے درجے کا سیلاب ہے اور بہاؤ 4 لاکھ 75 ہزار کیوسک تک پہنچ گیا ہے۔ حکام نے نشیبی علاقوں کے رہائشیوں کو الرٹ رہنے اور فوری حفاظتی اقدامات کرنے کی ہدایت کی ہے۔
تازہ ترین خبروں کے لیے پی این آئی کا فیس بک پیج فالو کریں
