پاک بحریہ کے تین سینئر افسران کو ریئر ایڈمرل کے عہدے پر ترقی دے دی گئی ہے۔ ترقی پانے والوں میں کموڈور محمد شاہنواز خان، کموڈور عاصم سہیل ملک اور کموڈور سہیل احمد عزمی شامل ہیں۔
محمد شاہنواز خان نے 1993 میں بحریہ کی سپلائی برانچ میں کمیشن حاصل کیا۔ وہ نیوی وار کالج لاہور اور نیشنل ڈیفنس یونیورسٹی اسلام آباد سے فارغ التحصیل ہیں۔ اپنے کیریئر میں وہ مختلف اہم عہدوں پر فائز رہے، اور اس وقت وزارت دفاعی پیداوار میں بطور ڈائریکٹر جنرل میونیشن پروڈکشنز خدمات انجام دے رہے ہیں۔
عاصم سہیل ملک نے 1995 میں آپریشنز برانچ میں کمیشن حاصل کیا۔ انہوں نے بنگلہ دیش، چین اور پاکستان سے اعلیٰ دفاعی کورسز کیے اور ماسٹرز کی ڈگری حاصل کی۔ انہوں نے کئی اہم کمانڈ اور اسٹاف عہدوں پر خدمات انجام دیں، اور اس وقت نیول ہیڈکوارٹرز اسلام آباد میں DGC4I کے طور پر تعینات ہیں۔
سہیل احمد عزمی نے 1996 میں بحریہ میں شمولیت اختیار کی۔ انہوں نے برطانیہ، پاکستان اور دیگر ممالک سے تربیت حاصل کی اور اہم کمانڈ اور اسٹاف ذمہ داریاں سنبھالیں۔ اس وقت وہ لاہور میں کمانڈر سینٹرل پنجاب اور کمانڈنٹ نیوی وار کالج کے طور پر خدمات انجام دے رہے ہیں۔
تینوں افسران کو ان کی نمایاں خدمات پر ستارہ امتیاز (ملٹری) سے نوازا گیا ہے۔
تازہ ترین خبروں کے لیے پی این آئی کا فیس بک پیج فالو کریں
