وزیراعظم شہباز شریف نے شنگھائی تعاون تنظیم (SCO) کے سربراہی اجلاس کی کامیاب میزبانی پر چین کو مبارکباد پیش کرتے ہوئے کہا کہ پاکستان چین کے ترقیاتی ماڈل سے سیکھنا چاہتا ہے۔
بیجنگ میں چینی وزیراعظم لی چیانگ سے ملاقات کے دوران دونوں رہنماؤں نے پاک چین تعلقات کو مزید مستحکم بنانے کے عزم کا اعادہ کیا۔ ملاقات میں فیصلہ کیا گیا کہ پاکستان جلد چینی کیپیٹل مارکیٹ میں پانڈا بانڈز جاری کرے گا جبکہ سی پیک کے تحت ایم ایل ون، قراقرم ہائی وے کی ری الائمنٹ اور گوادر پورٹ کے منصوبوں کو تیز رفتاری سے مکمل کرنے پر زور دیا گیا۔
دونوں ممالک نے سی پیک فیز 2، بشمول پانچ نئے کوریڈورز، پر تیزی سے کام کرنے اور مختلف شعبوں میں سرمایہ کاری بڑھانے پر اتفاق کیا۔ بی ٹو بی انویسٹمنٹ کانفرنس میں 300 پاکستانی اور 500 چینی کمپنیوں نے شرکت کی، جس میں زراعت، معدنیات، ٹیکسٹائل، صنعت اور آئی ٹی کو ترجیحی شعبے قرار دیا گیا۔ اعلامیے کے مطابق ملاقات میں جوائنٹ ایکشن پلان 2024-2029 پر دستخط کو اہم سنگِ میل قرار دیا گیا جبکہ سائنس و ٹیکنالوجی، آئی ٹی، میڈیا اور زراعت سمیت کئی معاہدوں پر بھی دستخط کیے گئے۔ دونوں رہنماؤں نے آئندہ سال پاک چین سفارتی تعلقات کی 75ویں سالگرہ شایانِ شان طریقے سے منانے پر بھی اتفاق کیا۔
تازہ ترین خبروں کے لیے پی این آئی کا فیس بک پیج فالو کریں
