بھارت کے زیر قبضہ جموں کے علاقے اکھنور سے دوسرا بڑا ریلا پاکستان کے دریائے چناب میں داخل ہو گیا ہے، جس کے باعث ہیڈ مرالہ پر انتہائی اونچے درجے کا سیلاب پیدا ہو گیا۔
انتظامیہ نے صورتحال کے پیش نظر چناب پل کو ہر قسم کی ٹریفک کے لیے بند کر دیا اور ہائی الرٹ جاری کر دیا ہے۔ حکام کے مطابق بھارت کی جانب سے چھوڑا گیا سیلابی ریلا اب ہیڈ خانکی کی طرف بڑھ رہا ہے، جبکہ خطرے کے پیش نظر متعدد دیہات خالی کرا لیے گئے ہیں۔ ذرائع کے مطابق ہیڈ خانکی کے قریب پانی کا بہاؤ 6 لاکھ کیوسک سے بڑھنے پر پہلا شگاف ڈالنے کی تیاریاں مکمل کر لی گئی ہیں۔ اس دوران 450 دیہات خالی کرانے کے لیے مساجد سے اعلانات بھی کروا دیے گئے ہیں۔
شدید کٹاؤ کے باعث بھلوال میں طالب والا پتن کے قریب کئی ایکڑ زرعی زمین تباہ ہو گئی، جبکہ دریائے راوی کا پانی ملتان میں عبدالحکیم کے قریب ریلوے ٹریک سے گزرنا شروع ہو گیا ہے۔ ملتان میں اکبر فلڈ بند پر دباؤ کم کرنے کے لیے ہیڈ محمد والا پر شگاف ڈالنے کا بھی امکان ہے۔
تازہ ترین خبروں کے لیے پی این آئی کا فیس بک پیج فالو کریں
